星期三喇，好快又放假．．．嘻！！
今朝好多人去左理工上堂，所以難得可以清靜少少，
於是又努力咁SCAN 下野同去碎紙，爽呀！！
食完飯返公司本來諗住繼續做野，不過煩煩老闆返左黎，
幫佢做左Ｄ Proposal後，佢就趕住出街，但佢臨出去時問我方唔方便同佢一齊落去，
因為佢有隻”碟”想買，怕比人買晒，但又趕住出街，
於是我就同佢一齊落樓，心諗咩碟咁巴閉，買遲陣都怕冇，
點知落到商場先知老闆係想買裝食物ｏ既碟，於是入左間鋪，
呢間鋪我食晏時經過，立下眼都見好多人ｏ係裏面，應該都做緊減價，
但不以為意，或者覺得ｄ野實貴同埋ｄ西裝食具都唔係太ｏ岩我，
所以冇去留意到。
跟老闆入去佢拎起隻淺圓碟睇，呢個我覺得適合做薄餅盤，又可以入得焗爐，
反轉睇下價錢原價＄245.- 我望到出面貼左75%，諗住做緊七五折，
仲諗住心算計下幾錢，老闆呢個時侯已經拎左部pocket pc 出黎，
睇住佢計．．．．$245.-x25% = $61.25, 跟住我仲答即係減$61.25，
點知老闆話唔係減 $61.25，係賣$61.25，我立時”吓”左一聲，
老闆話係咪好抵買呢？若果唔係都唔駛咁驚佢賣晒，呢個時候我再望出門口玻璃睇真ｄ，
先睇到係75% off，老闆比左一日蚊我就趕住走左，我就幫佢排隊比錢。
呢個時我個心仲好懷疑，係咪真係平咁多呀？我又冇拎銀包落黎，萬一誤會左唔夠錢比咪弊？
於是諗若果真係唔夠錢，我拎住隻碟先再打上去比女王叫佢黎救我，
費事放低隻碟上完去落黎買唔返就大鑊。但當見到前面有兩個女仔比錢，
部機打出2,xxx 折左之後係5xx，咁個心都定返ｄ，應該冇諗錯到，
排我後面位女士見我拎住隻碟，好似好有興趣，問我ｏ係邊度拎，
我指左比佢睇，佢立即拎埋過黎再排隊，仲問我隻碟入唔入得焗爐？
我話應該得卦，後來發現碟底有焗爐標誌，顯然呢位女士都未睇清楚，
唔理三七廿一拎左上手先，之後我同佢講，用黎焗pizza應該幾好，
位女士立即答我：『係媧，你咁提提一提我又覺得好ｏ岩呀，你真係叻喇！』
其實呢位女士係好斯文又有禮貌，不過佢呢翻說話令我諗起我個煩煩老闆，汗......!!!!
跟住上到公司先同ｄ同事講返呢間鋪減得咁平，等若果佢地有興趣可以去睇下，
而我自己又一次証明，我呢個係完全失敗ｏ既女人，對ｄ減價觸角真係等於零，
怪唔得一早比屋企某人話我係一個失敗ｏ既女人啦，今次又一例証喇∼∼哈哈！ | 
