＜＜幾乎被遺棄的一粒綠豆，依家就快開支散葉喇＞＞

＊　＊　＊　＊　＊

雖然琴日都訓得唔少，但今日依然可以訓到好晏先起身，
食過午飯去行陣超市，跟住返屋企抖下上陣網先再去街市買餸，
依家天熱冇咁熱，唔懶果陣都係鍾意自己整下野食。

早排有次煲綠豆沙，洗綠豆時有粒綠豆跌左ｏ係”星盤”冇沖走，
自己偷偷地發左芽，所以將佢移植左盤，都唔係好耐時間，佢竟然長大左仲結左果，
我都係第一次見到綠豆原來ｏ係咁樣生出黎ｏ既，第日試下自己種都好媧，
不過唔知要種幾多先夠煲一煲綠豆沙咯∼∼ ^^|||

聽天熱報告聽日好似會天氣轉涼，返工都係拎多件衫好ｄ喇。
唔知臨放假前兩日會唔會忙死呢？？

又到左星期六喇，有假放實在開心，琴晚雖然眼訓都係掛住上網，
今日訓到成一點先起身，本來諗住去飲茶，不過都係因為晏所以冇去到，
仲要睇左陣電視先出去，結果去左甜品店食飯，跟住順便買埋餸返屋企。

唔知係咪因為成三點先食飯又食得飽，去埋超市買完野返屋企諗住上陣網，
點知又覺得眼訓去左訓教，一訓又訓到成七點先起身，
似乎我真係放假要叉足十二粒鐘先夠，煮完飯又睇左陣電視，
有時真係覺得自己係超級懶人，一放假就係”食”同埋”訓”，
不過食得訓得都真係一件幸福ｏ既事，所以我都好樂意繼續過懶人生活，嘻！！

＜＜栗頭臨別時又黎送上一封離別信＞＞

＊　＊　＊　＊　＊

可能早兩日忙，加上就快放假，要好勤力做野，所以時間好似過得特別快，
今日又到星期三喇，女王今日放完假返黎，不過聽日又到分行秘書放假，
所以今日算係齊人喇。

朝早前細佬老闆比左個file我，原來係幫家姐老闆比我ｏ既，
因為家姐老闆今日放假，所以我都可以較為靜靜地做野，
仲可以幫埋煩煩老闆同心急老闆貼下label，好在今年佢地訂得少，
所以算快好攪掂，黎緊幾日希望可以清下手頭上ｏ既野準備放假。

＊　＊　＊　＊　＊

今晚去水滴屋企見到地鼠先生，原來水滴又長大可以轉世喇，
今次仍揀左白雪雪彈彈下ｏ既水滴，雖然佢個樣係比較奇怪，
不過想睇下遲ｄ變身會變成點，有時見有ｄ變左個ｃ奶髮型好攪笑，
希望又快ｄ將佢養大睇下佢變成咩樣先∼∼