雖然琴日都叉左十二個鐘電，精神都補返唔少，
不過夜晚都一樣眼訓，今朝七點幾醒左，不過知道放假當然恰埋眼再訓過，
醒下又訓咁一路到一點幾先起身，今日懶懶冇出去食晏，淨係煮左即食麵，
之後又係上陣網，但依家真係唔夠精神就唔對得部電腦耐，
到四點左右又上左床攤左大半個鐘先起身再去街市買野，
不過出去行陣都好ｄ，唔係吽ｏ係屋企真係越吽越想訓，
呢兩日假期都叫做補返唔少精神，而我都好返八九成，仲係耐唔中有ｄ咳同埋容易攰，
聽日返工又要等下星期先有得抖喇，都好想快ｄ忙完過聖誕。

呢兩日o既假期特別期待，因為病真係最想最想休息，
琴日都冇曳幾早上床訓，不過唔知做乜又腳抽筋，又係不斷抽下斷下果隻，
真係唔通人老左就機器壞？於是都係要揾屋企個按摩仔幫手按摩下先冇事，
同埋揾多隻被等對腳唔好凍，或者因為好夠暖，琴晚都算訓得幾好，
一直到今朝ｏ既十點幾，足足叉返十二粒鐘，成個星期訓到最好係今日喇，
所以起身精神都好返ｄ。

中午去飲茶，之後去睇下牒，最後去街市買埋餸返屋企，
不過行左咁多地方都比較攰，或者都仲未好得清，同埋近來都真係比較容易攰，
冇以前咁可以一撐就撐咁耐，今日至少比琴日咳少左，
所以話唔舒服休息真係好緊要，希望聽日再訓多ｄ好以好返八九成啦，
因為下星期返工又要博殺喇。

今日終於有精神打返日記喇，呢幾晚都攰到早早爬左上床，
放完一日假返工要清返ｄ文件，加上患上感冒留位鼻水頭重重，夜晚又訓得唔好，
琴日仲要埋頭努力咁寄左ｄ座枱曆，琴日真係攰到個人想散咁濟，尤其兩個膊頭，
真係好想揾人幫我『鍊』下，好在琴晚終於訓得好ｄ，今日精神返好多，
係就係由流鼻水開始轉做咳，不過都叫做進入尾聲，期望聽日後日可以抖返兩日會好好多。

家姐老闆同心急老闆最近追數都好似有返ｄ眉目，越來越接近目標，
我都好想佢地真係追得成，因為唔晒搬房真係好好多，依家係關鍵時期，
真係好緊張，今日聽到家姐老闆又同女王講，如果佢追到數要請我地食飯，
我不知幾想衡埋入房話我好等緊食呢餐飯，不過費事嚇親人喇，哈哈∼∼

不過，話時話望下月曆仲有兩星期就到聖誕，呢兩星期一定係最忙又最緊張的時侯，
但願一切順利啦，聽日後日都要好好咁休息休息先得喇。