又到左唔願返工的星期一，今日工作量都唔算太多，
都係一般send 下文件做下scaning 咁。

晏晝分行秘書老闆叫佢入房傾偈，又關埋房門，感覺都有ｄ野，
因為近來幾個秘書犯左小人又是非纏身，結果不出所料，
繼女王比人篤後，分行秘書都比人篤，其實正確ｄ應該係我地幾個都比人篤，
只係揾左分行秘書黎講，因為佢老闆話有人話我地成日傾偈，雖然佢老闆冇話邊個，
不過呢個人好明顯就係個『賤男』經理，除左佢，
仲有個女 downline 同埋個秘書『攪事秘書』，
我諗都冇咩邊個會咁得閒會去理人家秘書ｏ既事，當然因為佢唔係我老闆，
所以唔可以話我，唯有向分行秘書埋手，始終佢有份出糧比佢，而且係做成個分行ｏ既野，
其實聽女王講賤男之前都同前細佬闆篤過話我地傾偈多，因為恰細佬老闆細個佢好似要聽佢支笛，
我都唔明佢點解咁多管閒事，佢又冇份比錢請我地，咁都要理，
仲有佢果個是非downline，又係乜都關佢事，可惜佢地唔揾我講，
若果唔係我一定要話返佢地，不過佢地都唔敢ｏ係我面前話，可能知我唔會比面佢，
而我我ｄ老闆未必會聽佢咁多野。呢個賤男真係人如其名，成日最叻ｏ係背後篤人放冷戰，
仲係精人背後出口，揾分行女開口，但ｏ係人前就成日扮懵扮傻，以前都可能以為佢係好人，
自從經過舊年分行分裂事件，就知道佢係背後煽動ｏ既黑手，攪到兩邊分行ｄ人唔ｏ岩，
依家又插手連我地呢ｄ咁地位低微，微不足道ｏ既秘書仔都篤，
佢賤格ｏ既程度真係到左超級程度，比呢種人篤真係點都唔順氣，
第日有機會一定要同老闆反映先得，要提醒老闆呢種人真係要小心，
唔係背後無啦啦比人插一刀都未知，尤其前細佬老闆影響尤其大，唔想佢衰ｏ係呢ｄ人手上。

今日因為呢件事都有ｄ閔憎，至憎果ｄ咁ｏ既衰人，
好彩次次心情唔好返到深圳都總有機會比我發洩．．．．．
坐巴士到站個死人司機唔開後門比人落車，
淨係掛住睇上車ｄ人有冇落夠錢，我叫左兩次又按落車鐘都冇反應，
把鬼火走去前果落車，雖然成大班人ｏ係個門口迫緊上車，但我都話知佢地ｏ係咁佢推開晒落車，
落車後仲將ｄ企ｏ係度阻頭阻勢ｏ既人推開，之後個心好似舒服左好多咁，
雖然好似將ｄ怒氣發洩左ｏ係其他人身人，不過佢地太犯賤喇，自己又唔守秩序，
唯有要咁對付先得∼∼ ^+++^"

放假終於可以抖返兩日，因為上個星期ｏ既唔夠訓攪到虛火牙肉腫，
抖左兩日都叫做好得七七八八，至少食野唔駛咁辛苦。

琴晚本來要去參加前細佬老闆愛徒二號乖仔婚宴，不過因為家中有事唔可以去，
真係天意，但都叫比個機會可以抖返多ｄ，唔駛咁頻樸，
所以琴日去完飲茶都去花卉世界行下，依家入秋冇咁熱先去行，
今次買左兩盆『無花果』，諗住自已種完可以用黎煲湯，我諗仲會甜ｄ。

今朝約左配音王子去飲茶，仲有一個內地大學畢業生朋友，佢女朋友過左黎深圳，
所以一齊去飲茶，順便好等配音王子多ｄ機會同人講普通話都好，
之後又陪佢去買書架同埋床墊，不過佢又真係太優柔寡斷，買ｄ野都要考慮好耐，
真係激死，本來夜晚都諗住自己煮飯食，不過陪完佢都四點幾，
都唔想急住去買野返黎又要整，整完又要洗，所以最終都係諗住出去食，
至少比返ｄ時間自己。

聽日聽講會氣温急降，所以都要小心拎定多件衫唔好冷親。

呢幾日好懶冇打日記，因為夜訓比較眼訓，攪到又熱氣牙肉腫∼唉！

呢個星期都好努力咁做老闆ｄ Newsletter，
首先都係做左心急老闆某部份客需要轉換新計劃，雖然話係部份客但其實都有成百零個，
要逐個印summary做一頁建議書抄低新、舊保費計埋差額，然後加埋ｄ簡介同埋老闆寫ｏ既信，
仲有加個回郵信封，加埋一齊先入落信封封口，雖然並唔難做，但係都要幾個工序，
自己張枱又細，所以有時一日的起肝做先整到十幾個，除非果日完全唔係做其他野啦，
到今日都仲有六十個未整，攞命！聽日雖然做唔晒但下個星期都要幫家姐老闆寄下野喇，
首先要做一百個係一封信加一個塑膠座枱月曆，最怕係攤開晒ｄ野後老闆又狂叫你做其他野，
就會好閔憎，希望可以順利快手做多ｄ啦，做完下個月先開始寄聖誕咭，有排捱∼

今日同家姐老闆傾開偈我都做返”金手指”同佢講個攪事秘書ｏ既野，
仲有賤男個女downlineｏ既野，因為佢上次走去同前細佬老闆度篤女王，
呢個又係攪事是非精，兩個都係同ｄ agent 懶friend 拍晒心口幫人做野，
賤男女downline 已經比佢上司知道佢多管閒事幫人做教訓左佢，
至於攪事秘書，家姐老闆都話佢傻，話佢幫其他人做野佢老闆實有所謂，
第日同佢老闆傾開偈八下，最衰次次講到咁上下老闆就有電話打黎揾佢，
唔可以講得詳細ｄ，因為都仲有好多野想講，不過講完後條氣順返ｄ，
雖然做金手指好似好衰，不過對住果ｄ衰人，只係學返佢地嗟，而且我都係講事實，
唔好成日以為我地幾個好恰，反正我地都係衰人喇，當然要做衰人做ｏ既野啦！哼！

聽日星期五喇，真係好想快ｄ抖下∼！