雖然琴晚都唔早訓，但今日唔算晏起身，可能琴日訓得太多，
因為琴日冇去飲茶，今日去飲返補數，之後去行左陣街，去左超市，
返屋企上左陣網再去街市買餸返屋企煮飯仔。

今日天氣麻麻，有霧又有雨，好似今晚會涼返ｄ，應該呢個聖誕會凍返少少，
或者咁樣會有氣氛ｄ啦，不過聽朝仲要早起身，天氣凍就慘喇。
而聽日開始ｄ agent 開始唔駛打咭返工，所以朝早應該會比較靜ｄ，
最鍾意就係呢個環境喇，但我預計聽日應該多野做，因為家姐老闆早兩日去見客，
而我聽日仲返得半日添，ｄ野谷住一朝要做晒，但忙完可以放下假，都值得ｏ既，
但中午幾個秘書一齊同分行女經理去飲茶，真係好去食呢ｄ飯，好拘謹，
仲要有個好唔鍾意ｏ既秘書ｏ係度添，我估聽日都會講下未來分工ｏ既野喇，
唉∼真係想唔去，不過實比女王同分行秘書打死，嘻!：ｐ

好耐冇幫個Blog 換下衫，今日心血來潮想整下佢，揾個雪人黎應下節都好，
希望有返ｄ過節feel 啦。

琴晚放工同內地一個大學畢業年青朋友仔去食自助餐，
我地都好似一段時間冇去喇，諗住帶個朋友仔去，雖然食九點場，
不過人都唔少，但感覺上冇以前咁多野食，仲有冇咁豐富，
可能又係一貫定律，生意做到出左名有人氣，咁就唔再咁注重食物質素，
反正都大把人幫襯，若果係咁我諗都少ｄ幫襯喇，寧願去返屋企附近問酒店食好過喇。
食完都接近十二點，一齊陪朋友去坐車返屋企，返到屋企再上陣網，
結果都成點幾兩點先訓，果陣眼訓到非常喇。

今日唔知係咪天陰陰，一路訓都唔知咩時間，醒完又訓，
結果諗住起身望下幾點時，發現今次又破晒紀錄，原來果陣都已經下午四點，
若唔係起身望鐘，我諗我都仲可以再訓，因為我訓教大過天，可能唔駛食野都得，
起身梳洗後有人對住豎起手指公，即係話我利害，可以訓到咁晏都得，
我都唔知點解我可以訓得咁勁，不過的確係好滿足。
今次起身後唔駛去食野，而係直接去買餸，連早餐午餐都慳返。

今日係冬至一個中國人好著重ｏ既節日，所以覺得ｄ野貴左少少，
但我買左唔多，都唔太有影響，今年冬至都好温暖，過兩日好似話會凍返少少，
但至好係放假先凍啦，唔係一大清早黑媽媽又凍就好慘喇，
返多半日可以放兩日假，好期待呢∼∼

<<鴨記二手買返黎的 SE W880i>>

<<呢部機最鍾意係佢夠"薄">>

＊　＊　＊　＊　＊

早幾日怪戰去深水埗鴨記買左部二手電話，係SE W880i，
呢部機都算新款，部機又新淨，而且超平，開價三佰蚊講到二百五，
佢諗住咁平即使唔得賣返出去都未必會蝕，於是買左，
拎去華強北呢邊整手機地方睇，話部機應該入過水所以壞左，不過可以整，
結果用左二百蚊整返好，再買左舊電，全部加埋都係五佰左右，又用動媧，
於是貪新鮮換下手機，琴晚就係卦住整機夜左訓，冇計啦，新『屎坑』丫嘛！哈哈！

今日分別同家姐老闆同埋心急老闆傾過，佢兩個ｄ數應該都差不多喇，
如果有咩意外應該陪數，真係謝天謝地喇。
繼收到家姐老闆同埋前細佬老闆O既沖涼液同潤膚套裝，
同埋前細佬老闆大師姐downline　ｏ既貓貓毛毛拖鞋聖誕禮物後，
今日又收到心急老闆o既聖誕禮物，又係hand cream，兩個老闆都鍾意買hand cream比我，
都好幾體貼，一定怕做粗我對手定喇，但又真係用得著，真係好開心喇，
其實都唔係在乎禮物ｏ既價值，係在乎果份心意。

臨食飯冇耐同家姐老闆傾開偈，乘機提起賤男提議ｏ既秘書共同分左分行秘書工作事，
從家姐老闆口中，聽到除左賤男外，仲有地獄女經理，麻麻煩煩話唔滿意分行秘書，
大多數時間用左做分行經理ｏ既私人野，覺得唔公平，其實講到尾咪又係一個『錢』字？
不過分行女經理話滿意個分行秘書，所以自己比晒錢請返另外請過一個，
但賤男同地獄又唔想洗錢，所以提出將ｄ工作分晒比秘書做。
家姐老闆都話咁樣唔work，因為我ｏ係私人請ｏ既秘書，係唔可以做公家野，
尤其對心急老闆唔公平，而且我都數左少少賤男ｄ野，家姐老闆話佢地真係要我一齊做佢會反對。

食飯時我同女王、分行秘書等講返呢件事，分行秘書聽到佢老闆都係有苦衷可能都冇咁激氣，
但若真係實行起黎佢都有可能會唔做。食完飯後同分行秘書邊行邊傾一齊去郵局寄野，
跟住接到家姐老闆電話，話同煩煩老闆傾左，２４號會比我放半日，
另外又提到秘書分工ｏ既事，由於當日煩煩老闆冇去開會，佢話若佢在場都唔會同意，
點都好，我至少依家同老闆講左件事同表左態，雖然最終唔知結果會點，
但至少我都將我ｏ既感覺感受講左出黎，等老闆們知道，我都係想維護我地間ｏ既權益，
同埋等自己個心舒服ｄ，唔想ｄ野屈屈埋埋影響心情，因為唔早講到乜都決定晒就已經太遲喇，
黎緊就係等最終結果，不過應該都係一月ｏ既事喇。

聽左家姐老闆話下星期一可以放早，ｄ holiday mood 立即標晒出黎，
我都好想使ｄ放假。聽晚可能去食宵夜自助餐，好期待呢∼∼∼