醫院內，碰到陳啟明教授，問佢有乜病呀？陳教授話：「我睇完症，走嘞，我邊有病啫。」左丁山為之啞然失笑，點會唔記得佢係醫學教授，專醫骨科，在醫院睇症㗎？（後翻查資料，佢嘅正式銜頭係香港中文大學醫學院矯形外科及創傷學系講座教授及博士導師），好多人年紀大咗，就覺得膝頭軟，落樓梯覺得痛，唔想睇陳教授呢類專科醫生唔得。
陳教授動作快捷，次日左丁山就收到佢與方玉輝醫生，麥素寧小姐，容樹恒醫生，方廸培教授一同主編嘅兩本書，一本叫做《健康跑步樂》，另一本叫做《健康游泳樂》，內容簡白，專係教人如何謹慎處理跑步游泳與健康呢兩項運動帶來嘅肢體護理問題，譬如講跑步，跑步係最多人日日做緊嘅運動，跑馬地馬場黃昏時分就有不少人跑步，賓架C，社長M皆是常客。本書話跑步主要令身體下肢的大肌肉組收縮，包括背肌、四頭肌和膕繩肌。跑步時，肌肉用以新陳代謝嘅氧氣需求量就會倍增。
跑步會影響心臟，定期跑步可以減低患上心臟機會，增加好膽固醇，減少壞膽固醇及三酸甘油脂，改善葡萄糖嘅耐受性，控制糖尿病，減少血小板凝固和積聚。
跑步有咁多好處，係唔係可以落街就跑，一定健康？陳教授等編者話唔係，唔該裝備吓先，首先係跑鞋，薄底鞋用作比賽，定期跑步健身就用厚底鞋，買鞋最好在下午或晚上，原來活動咗大半日，我地嘅腳會在下午稍後時間變得大咗一啲，雙腳會大過朝頭早，所以下午買鞋會啱着啲，唔會買到對「刮腳鞋」。
買完對鞋，甚麼時間跑步最好？早上清晨空氣清新，固然係好，但打工仔要趕上班，多在放工後先至有時間跑步，陳教授等人話最緊要揀到有較充足光線，自己熟悉嘅平坦路面跑步，穿着反光衣物與反光跑鞋，讓單車/汽車司機容易睇見，在空氣污染指數到達101-200時候，有心臟及呼吸不適嘅人士最好跑少啲。跑得耐就要飲水，美國運動醫學會建議，運動前二至三小時，應飲400-600毫升，運動期間每十五至二十分鐘飲150-350毫升，避免有氣及利尿飲品如汽水及啤酒等。呢本《健康跑步樂》就係一本定期跑步人士嘅「聖經」，愛此道者最好買番一本睇完又睇。
左丁山
+ + +
唉，最近多了人練跑，不得不把這篇放上來曬太陽，希望沒有人修身變傷身。
|
