好友2月生日，又鐘意食日式野，剛好1月時見到有團購日式放題就買了，神串一日式放題2小時，買完之後見到網上食評話唔掂，都驚驚地。但都買左了，而且團購買，仲會有紅豆丸子送添….
神串一在The One 五樓，我地約左6:00-8:00pm，大約5:45pm，門口已經有好多人在等了，今次帶埋老公同阿囡出去，佢地都係第一次食放題~~ 還未入座，看看門口的食物及優惠，原來當月生日，每5位就可以免生日的人的費用，仲送壽司蛋糕一個，噢!! 咁我地咪蝕左!!
飲品：清酒、啤酒、汽水都係任飲的，我地叫左一支冷一支暖，我平時唔飲酒的都要試試，原來冷暖飲黎係會有唔同感覺的，冷的好易入口，而且較甜，暖的有少許嗆喉，但以我唔飲得酒既人都飲到既，就知唔係好勁。
食物方面有好多款，味道都唔差，個口未停過，連阿囡都唔想食自己碗粥仔，叉都唔用咁食到津津有味。
刺身：每款刺身都好新鮮，但款式唔多，松葉蟹、甜蝦、北寄貝、吞拿魚好正，唯獨三文魚不太ok (還見到有銀色的皮及皮下脂肪那層)。
燒物：唔會燒得太乾，上碟前還灑上SALT，惹味~~
手握壽司/卷物/手卷：這些飽肚食物，只叫了少少，蟹肉棒、花竹蝦壽司，好大件，三文魚芒果卷，但食落無芒果的。
沙律/小食：要讚下個霜降牛肉他他，好正，汁好味肉不鞋
一品料理：叫了冷蕎麥面但沒有來，海蟹粥唔見有蟹只見蝦，清酒蜆好多沙，雪花牛肉鍋 (連扁烏冬)，味道清清的，辣酒螺夠辣。
不經不覺已兩小時了，侍應沒有送上每人一客紅豆丸子，我亦忘了這回事，又蝕了!!
|
