婆婆已經病咗一段時間，而且係醫院係住咗一段日子。今日咁岩學校放假，於是我尋晚就打畀姨媽諗住叫佢帶我去見下婆婆。好彩姨媽今次都肯。

我地搭姨媽架車去睇佢，原來佢住既地方都幾入架，又要上山又落斜都幾煩^^"

到咗病房，我地就跟姨媽行，終於到咗婆婆住既病房喇~第1眼見到佢，發現佢真係瘦咗好多，以前圓圓既面以經無咗，隻手瘦到可以見到骨，目光好呆滯。之後我嘗試叫佢，點知佢竟然好似唔識我咁，無哂反應。而當佢見到姨媽既時候，都只能夠用好微弱既聲叫佢，見到佢咁我真係好心痛。工人姐姐就用毛巾幫佢洗面，之後姨媽就餵佢飲凝固粉加水，姨媽話因為佢依家食野同飲野既能力都差咗，所以要加凝固粉令佢飲水既時候都容易d，當姨媽逐小逐小餵佢飲既時候，我見佢既眼神好辛苦，好似想話我地知佢唔想飲d咁既野。飲完凝固水，又到姐姐餵佢食麥皮，雖然已經餵得好慢，但佢都係唔係好想食咁，見到佢咁辛苦，我既眼淚就開始想流喇，但我就即刻同自己講我唔可以係佢面前喊架，唔係既話佢都會喊架，於是我就好努力咁忍。陪咗佢一陣，我地就走喇。

上到車，姨媽就同我地講，每次佢去探婆婆個陣，婆婆都係無理佢，但當佢走之後，姑娘就話畀姨媽知佢每次都有喊。好彩聽日佢終於可以出院返去姨媽到住。不過姨媽話佢出院之後佢會更忙，用更多錢，因為佢需要買一張浴椅去廁所同沖涼，另外又要買好多尿片，萬一夜晚佢要去廁所去唔到都唔洗忍咁辛苦，重有姨媽話可能要買整碎食既器具方便整碎畀佢食，所以希望佢身體唔好太差，咁就唔需要送佢去療養院住洗更多錢。

當我今日睇完佢同聽完姨媽講之後，我都覺得佢同姨媽依家真係好辛苦，雖然姨媽洗錢唔係問題，但見到自己個媽咁真係好心痛架。而身為孫既我，今次探完佢之後我都好傷心，由我出世至今，佢都係最錫我，細細個我一出世就因心臟病要做手術，而且身體又特別差，經常出入醫院，每次都有佢陪我，好多時重留院陪我瞓，我要咩佢多數都會買。而且一直都同我一齊住，因為佢知道我媽咪一定唔識照顧我，再加上佢擔心當我屋企爸爸同媽咪嘈既時候會嚇親我，所以從來都唔會離開我地。直至最近依幾年，佢身體開始差，所以姨媽先叫佢去佢到住，起初佢都唔肯架，因為佢擔心我有事，所以間唔中都會返嚟住幾晚既。而且姨媽重話佢曾經試過幾次發夢甩到我無人理，攪到佢成日都好擔心亦因為咁，終於由心病變成依家既身病。見到佢因為我攪成咁我真係覺得自己好對唔住佢，一直以嚟我有事佢都會盡力幫我，又成日令我開心，但依家到佢有事，我就唔可以盡孝心去照顧佢，只能夠係背後為佢擔心為佢流淚，我真係好無用。平日又少關心佢，真係覺得自己好過份。雖然我知依家既佢年幾咁老，有咁既老人病係正常，而且係無可能好得返，但我希望佢個病唔會愈來愈嚴重，咁我已經足夠。