【明報專訊】最近電視劇《老表，你好嘢》大玩中港矛盾，觀眾有讚有彈，不過Emily勢估唔到，中港矛盾居然成為否定「一國兩制」嘅論據！Emily噚日去咗聽由香港基本法推介聯席會議主辦嘅「全港中學生辯論賽基本法盃」，辯題係「一國兩制是保持香港繁榮穩定的最佳模式」，反方隊伍就提出只要「一國一制」，中港融合，咁香港咪唔會再有中港矛盾咯！
反方又提出，家內地都有唔少經濟發展模式參考香港，「一制」可以令香港帶動內地改變。不過正方就質疑，中國制度從來寫得漂亮，又搬出維權人士李旺陽被自殺、劉曉波被囚等，批評反方太樂觀。雙方愈拗愈激動，「自由辯論」時仲有啲似鬧交，但辯駁之快，都贏得全場掌聲。
雖然反方忽視咗一啲內地陰暗面，但評判馬嶽都讚佢地不失新思維，儘管執行上有啲問題。至於另一評判曾鈺成，就提醒辯論員唔可以靠惡，最重要講理，又話自己成日好擔心立法會內同事愈講愈高音會爆血管。至於比賽結果，由支持「一國兩制」嘅正方聖若瑟書院勝出。
