今日突然好想食腸粉同煎釀三寶宵夜，落左去走鬼檔買
好唔開心煎釀三寶無開，只有腸粉

香港好多地方都已經無左走鬼宵夜檔
我唔知重可以食到宵夜檔幾耐呢？
唔想LEE到會消失

諗返起，其實由細到大都好鍾意食腸粉
小學會係OK前面既走鬼檔買三蚊腸粉兩蚊魚蛋做早餐（4條腸粉6粒魚蛋）
由佢用會痴住D腸粉既紙，去到有油面既紙，去到唔再見到佢

小時我重係一個早睡早起既乖小孩
要食到腸粉
就要7點前去到OK前面買
唔係就會收左檔

星期六日會跟我爸落去飲茶
小時很挑食，好多野都唔會食
蝦餃燒賣都唔鍾意食
只係鍾意食腸粉同鳳爪

當年既朗景酒樓重係推點心車仔
要食到腸粉，一定要係車出黎食買到
唔係好快就會無晒

每次就食兩碟牛腸
雖然係叫牛腸，但係我係要味唔要牛
中間D牛都係比屋企人食
點解唔叫齋腸？
因為齋腸既皮，食落真係無牛味囉

當阿爸同我講：「你知唔知食兩碟牛腸成40蚊，好貴架！」
既時候，我真係呆左，乜原來，咁貴架？
40蚊有幾多？當一包細薯片都係賣2蚊既時候，40蚊買到20包架啦

到中學既時候
間中會同同學朝早去西邊圍買腸粉食早餐
個到2蚊3條腸粉／魚蛋
D花生醬同甜醬，係我咁耐以黎食過最好食既
老板都好好人，見過一個小朋友去買1蚊魚蛋
真係比3粒佢，重要買要唔要用紙包，要唔要膠袋

可惜都已經無左...

喜歡既野，慢慢，慢慢的消失

香港都慢慢變質...