大家都知我哋而家讀緊女校家啦, 通常大家都覺得女校無乜好處, 例如:覺得成日對住d女仔好悶lor~~ But 你睇完小儀寫完佢對女校的感覺, 或許你有一d改觀~~

以下係小儀對女校嘅感覺:

唔知係咪同讀女校有關,中學階段嘅生活都幾悶,來來去去,朝見口晚見面都係女人,咁好彩俾你見到個男人嘞,都係d無型無款嘅亞sir,所以真係幾乏味.

但係都唔知係咪同讀女校有關,迷信事情成日都會喺校園入面出現.好似小息時候有同學玩塔羅牌問前程啦,仲有日日刨星座書,年年“咪”d乜年運程書,總之愈神怪愈興奮,愈奇異愈多人尋迷,就因為知道有同學係神婆一族,於是大家就夾計去玩玩佢.

記得那年係中二, 午飯嘅時候,一班同學前所未有咁齊心集合埋一齊, 圍攻呢位女同學,所謂圍攻其實講得嚴重咗,我哋只係圍埋一堆, 作狀扮一個認真兼覺得好有誠意嘅表情, 話佢知有一個好靈好靈嘅愛情占卜,只要合埋雙眼,誠心許願,然後慢慢張大個口, 睇嚇個口形會變成咩形狀,就知道愛情運會如何.(都唔明點解當時咁誇張嘅大話都講得出口)

哈,那位女同學,竟然好似拍警訊嘅 “案件重演” 入面嘅受害人咁完全受晒騙徒嘅引誘,照版做一次,仲有咁足做咁足,當呢位女同學將個咀張到最大嘅時候,我哋成班同學瞄準目標,將手上預先收埋嘅擦膠碎一次過掟晒入佢個大口度! 嘩,不得了,佢成個口滿晒擦膠碎,驟眼睇落去,以為佢含住舊飯添呀!

當然啦, 呢次嘅大整蠱換嚟嘅係我哋成班 “兇手” 被 “受害者” 打到遍體麟傷啦!, 但鬼叫佢咁迷信,鬼叫佢連我哋都信咩! 希望經過呢次教訓,呢位女同學長大後唔好成為 “補藥黨” 或 “種金黨”目標啦,如果唔係, 佢死梗.

女校生活真係咁悶? 未必! 剩係咁樣都玩餐死,悶定唔悶? 睇你點樣去令自己嘅悶旦生活改寫啫!

唔知道大家有冇對我哋間學校有一d改觀呢???