今日係亞妹結婚嘅大日子，原本應該好開心嘅，但唔知點解，今日一啲都唔覺得屋企喺度搞緊喜事囉，可能係因為我哋個個都唔鍾意佢老公啦，唔知呢，總之今日就個個都唔開心啦。
但係我最嬲嘅事就係，佢哋結婚咪結婚，仲咩要老豆幫佢比住錢先呀，冇錢咪唔好結婚囉，冇錢學咩人娶老婆呀，連結婚嗰幾佰蚊都要女家出，咁樣咩人娶老婆娶新抱呀，冇錢就唔好結啦，宜家結遲一陣駛死咩，搞到要老豆比錢結婚，都唔知佢哋覺唔覺得醜架。
唉！宜家既然佢哋結咗婚囉，佢哋就一定要搬出去架啦，唔可以再係亞媽度住架啦，咁樣都好嘅，起碼唔駛再驚啲收數佬搞住亞媽先啦，係咪？但係另一方面，如果借結咗婚呢個籍口唔搬嘅，咁咪大件事，總之，佢哋一結咗婚就大把手尾跟啦，我覺得今晚嗰條仔一定會大條道理咁搬入亞媽屋企囉，因為未搵到地方呀嘛，嗰邊又唔比住囉，咁咪唯有住喺亞媽度先囉，等到搵到屋先搬囉，但係喺亞媽度好食好住，咁樣邊個會搬囉。
