前日執電腦果陣唔覺意睇返以前讀書果陣做過既功課 ~

諗番起以前返學既日子 ~ 成班同學仔一齊幾好玩啊 ~

^^上堂訓教 , 打PsP , 上網玩遊戲 , 同隔離吹水  ; 一齊讀書 , 一齊測驗 , 一齊出貓 , 一齊考試 , 一齊抄功課 , 一齊蝦Miss , 又一齊氹返Miss ^^

哈哈 ~ 真係好令人懷念 ~

諗返起之前無讀書 , 唔係因為讀唔成 , 只係因為我一直憂慮緊一樣嘢 : 我究竟係咪係度浪費緊青春 ?

讀咁多書係咪真係有用 ? 書入面教咁多既知識道德道理 , 係現實生活中我真係極少見到用到 ~ 最終咪又係為張成績表張證書 ~

所以我倒不如盡快結束學生生涯 ~ 早啲進入社會大學 ~ 無謂浪費時間 , 金錢 , 精神 ~

好多人話我讀到高二做咩唔讀埋高三咁浪費 , 真係聽都聽到厭聽到煩 ~

無人會明白我既諗法 ~ 亦都好少人會認同我既諗法 ~

當我想離開學校果陣我已經下定決心 : 我就要證明俾人睇就算唔係大學生先至係有用既人 , 唔係讀得多書先會成功 ! 我唔想過住啲同其它人一樣生活節奏既日子 ! 日日朝9晚5既生活係我最討厭既 ! 由其是我老母 ~ 成日淨係想我讀書讀書 ~ 雖然我知咁係為我好 ~ 但我有我選擇既權利 ! 我就更加要證明俾佢睇 ! 我就係要為打破傳統而下呢個決定 !

( 可笑既係我曾經係發誓一定要讀大學 ~ 因為聽講大學有四年時間可以玩^o^ ~ 我對讀書既態度之所以會180度改變唯一解釋就係 : 人係會隨住歲月而改變既動物 ~  )

當我選擇咗離開校園時 , 我深深明白到我已經選擇咗一條難行既路 . . . . . .

我亦都考慮到我既然係比人早起步就更加要比人早到達終點 ~

我係一個唔會番轉頭行既人 , 與其話"唔會" , 不如話"唔識"會更貼切 ~

(就連行街行過咗個街口 , 我都只會搵另一條路兜返去目的地 ~ 唔會行回頭路 ~ 可能係天生我只會向前望 ~ )

人生路上都如此 ~ 向前望向前行 ! 就算條路難行都係自己揀既 ! 唔會後悔 ! 行完啲難行既路前面轉角一定會有希望同幸福等你 ! 今個轉角唔係就下一個轉角 ! 最終一定會到達目的地 !

既然決定咗就要去實行 ! 為求達到目的我會"不擇手段" !  ( " 不擇手段 "  唔係指作姦犯科既事 , 係我會用我自己既方法來達到目的 ! 視乎付出幾多同代價幾大 ! )

記得我離開校園果陣就好似人間蒸發咁 . . . . . . 話唔返就唔返 . . . . . . 呢啲算唔算係逃避呢 ?

雖然係逃避 , 但另一方面我已經係度面對緊社會 !

而我依家就係學習緊點樣去面對困難 ! 唔可以遇到唔鐘意既事就逃避 ! 係一份對自己同對別人既責任心 !

待續 . . .