今日我想講下要具備D咩條件至可以做班會職員。

首先，係遇到問題GE時候淨係識得喊係冇用GE，就算你喊到好可憐，令人聞之落淚，對個問題又有D咩幫助呢？係咪可以用呢D時間去唸下究竟有D咩具體而可行GE方法去解決呢個問題呢？人地都話啦：「你若不想做，會找到一個逃避的方法；你若想做，會找到一個解決的方法。」如果淨係需要識得以喊去逃避就做到班會職員GE話，咁大把人都做到啦，又駛嘜你做呀？如果遇到問題GE時候就淨係識得以喊黎發洩自己GE情緒，順便用喊去逃避，由其他人幫你而唔去積極尋求解決方法，咁呢個態度，就算你GE身份只係一個平平凡凡GE學生都唔得啦，莫講話仲係做班會職員。

另外，班會職員自己GE成績都唔可以太差，既然連自己GE學業都未搞得掂，仲邊有咁多時間、精力同頭腦去處理班裡面咁多GE事情同問題呢？因為我地班唔係精英班，所以都唔要求你成績要80、90分，只係平均分起碼都65、70啦，連合格60分都冇，咁你想點樣去管理好我地班呢？古語有云：「修身，齊家，治國，平天下。」連自己都管理唔好自己，又點可以管理好班會，全班，甚至笑傲FORM3呢？中國歷代GE名君，全部都係從小就律己甚嚴，咁樣大個左之後先至可以管理好一個國家。同樣地，對自己GE學業都唔著緊GE人，又點會對班中事務著緊呢？

而且，班會職員應該係要公正無私，唔可以話係同邊個FRIEND D或者係有求於邊個就聽曬佢地講。就好似跳大繩比賽咁，唔可以話係同佢FRIEND就比佢排前D，咁樣一黎對其他同學唔公平，二黎因為唔係跟實力排，所以就好難贏，三黎你咁樣做就注定會失去民心。又好似派汽水咁，表面上呢就同全班講話唔可以揀要邊款，實際上自己私下已經揀定曬，去到自己個位就「順便」派自己之前揀那罐。如果你擺自己GE私心係全班利益前，咁仲邊有資格做班會職員呢？

最後，班會職員應該勇於承擔自己GE過失並作出適當的改善，遇到問題GE時候唔好淨係識得賴人呢樣唔得呢樣唔好。唐代唐太宗時，有一個著名的諫臣魏徵，時常對太宗作出勸喻，使太宗明白自己的過失並作出改正。太宗之所以能成為歷史上一代明君，最重要的原因是他能聽從別人的勸喻並作出改過。所謂「忠言逆耳」，忠言大多是逆耳的，若能學會承認自己的過失並作出改善，我們班必能有一番作為。

若能做到以上四點，我們班必能笑傲FORM3，這有賴各位班會職員和同學的合作了。