終於打季軍戰喇,Silkie終於都得閒幫Hall C打波啦~~

可惜開場嗰陣,我哋默契唔夠,好快被拉開10分距離,始料不及,重整陣形後,慢慢拉近距離,不過,我哋好黑仔,喺一次進攻嘅時候,我同Silkie炒埋一碟,Silkie俾對方整到拗柴,我就雙膝跪地

雖然係咁,Silkie都選擇紮住隻腳上陣,全隊人都戥佢驚~~下半場,我哋打得好定,對方已經冇咁易喺內線起手,不過我哋唔好彩,好多波都係in & out

最後我哋輸咗呀,但係我好滿足~~我覺得今場係Hall C打得最好嘅一場,我自己都係,竟然喺跛手嘅情況下攞到8分,其中4分仲要係射波入架!!Hall C人又齊心喎,打籃球最開心就係咁~~~

之後男仔都係爭季軍,不過場比賽就充滿火藥味.....

先有對方球員冇品舉中指,跟手就雙方有拗撬,爭啲講手,成場比賽都有身體碰撞,場邊又有人煽風點火,就喺咁嘅氣氛下,Hall C贏咗

返到 hall,同小高去搵Silkie,諗住煮嘢俾佢食,但就好搞笑咁變咗三個人傾通頂,其實我哋三個唔係太熟,不過就好啱嘴形,傾咗好多personal嘅嘢