繼上回因為自己嘅黑暗風，無意間諗起「黑」。

買左一段時間，好耐之前想放上blog，
但等到沉寂，等到地鐵燈箱poster除低先，
唔係pakho fans，唔想被人以為係打手文章，
私人日記（算係呱？）裡面，都係第一次提柏豪個名，
感覺上，都幾hardsell，係呢，因為我聽到真係好感動。

GET WELL SOON，
柏豪有抑鬱過，有低落過，
今日，算係有少許成就，
單單講叱吒銅獎已經能夠證明實力。
而佢呢隻碟，感動位在於為一位好要好嘅朋友而製作，
唔知係咪以呢個咁感動人嘅賣點吸引人，
只想講，我買左。
首首歌都可以做主打，首首都派台。

金，我覺得可以做青年聚會嘅詩歌。

好少歌碟引到我買，即使咁喜歡hip hop，屋企都係得幾隻，
JPOP碟多，canto pop又好似無乜，
加上上網有時下興嘅lyric video同MV，係唔駛買碟都聽到高質音樂嗰種，
買碟啲聲會更好，但係爭得唔遠，敢用beats pro同interface擔保。

GET WELL SOON，
今年無之前病得咁強咁頻密，
係發現自己有情緒病，或者一路都有，
係呢一兩年先爆發出黎，週期性復發，
總之呢個季節，就會瘋狂地用錢，
呢兩個月，唔計二月啲逼住用錢嘅日子，
總支出係萬二蚊，唔想依賴物質而快樂，
大額支出，感覺上係頭痛呀？
扑一棍落隻腳度啦，頭會無咁痛，
實際上頭痛唔會因為呢一棍而好返。

無柏豪咁犀利，可以一早就知自己嘅興趣，而且會苦練，
由歌喉，樣貌到身高，相關工作經驗，呢啲根本無得比，
仲有好公司，好團隊，呢啲只能奢望，
並非自卑自憐，我無呢啲咁嘅機會，
玩嘅音樂（算係？）仲要更小眾化，
但係我唔會放棄，
因為我都想整一隻，完全為妳而整一隻，
未必係無懈可擊，可能好差，但係，就係因為妳而做。
即使唔係食呢行飯，適合做幕後都好，都要出一隻。

自己加比自己嘅壓力好似好多，
因為情緒問題，啲支出似乎成為屋企沉重嘅負擔，
之前話儲嘅機票錢，老婆本，望下間房，係哂度啦，
積蓄所餘無幾，都要忍。
忍住唔可以超過朋友呢條界，唔可以再超過，
當然，無掙扎就唔會有情緒病，十級矛盾，
假若我嘅志願同我中五一樣做牧者，會無時間拍拖，
我做cam man，只會令對方快啲殘快啲死，
做emcee喇喎，養自己都成問題，
結到婚又點？貧賤夫妻百事哀。
第時真係會結婚的話，我係要決定娶妳，唔再諗其他。
都係個sales令我明得更多，
我無理由因為個樣似而不停被佢抽佣，
意思即係話，我忍唔到超過條線嘅話，就正正式式追妳

亦係應棍嘅歌。

好想見到妳，亦都好驚見到妳，
好想見，唔止好耐無見，係我無時無刻都想見，
好多說話想講，即使無共同話題，妳變得唔識中文，都唔緊要，
好驚見到妳，我驚妳一走我會撤底崩潰，
驚連最唔想講，最唔應該講但係最易講出口嗰句都講埋，
我被人笑，唔怕，我驚連妳都備受牽連，
搵唔到食係我嘅事，我唔想連妳都餓死，
除非，我有一日放棄夢想，放棄原則，
所有夢想嘅一切，都包含住妳嘅元素。
或者任何作品係我幻想出黎嘅妳，
但我太愛呢啲興趣先會用呢類方式表達，
唔好介意，因為我拙口笨舌，
女人心海底針，唔緊要
到最後，就算我捉唔緊妳個心，
我都會見到真實嘅妳，就好似見到自己一樣。

只要妳未死，夢想仍然得以延續，
妳拍拖妳嫁人妳生仔，甚至孫都有埋，
一切都可以延續，
我一早已經將心交付，
一早已經有準備完全撕裂自己。

短期目標，係做從地獄回來的男人，
未試過有地獄般嘅考驗，講乜嘢重生，
希望會get well soon，精神得到康復。