基於之前一直都忙功課，冇時間TVB個頒獎禮，所以延至今日先寫文，望各位見諒。以下係我個人對各賽果的意見及心水(只限某些有興趣的項目才顯示)：

最佳劇集：《潛行狙擊》
評語：冇點睇過，但成套個風格好有外國連續劇感覺，不失為新嘗試，但情慾情面過多，而法拉的廣東話口音都仲未係好接受到。

最佳男主角：鄭嘉穎《怒火街頭》
評語：我其實都buy Law霸既，始終比上一次拎視帝更加名符其實。但係在LAW霸因為贏官司而害左某被告自殺的一幕內心戲，可以處理得更好，表面左d。
心水：陳展鵬《真相》
簽回TVB之後，演過好多閒角，終於在《真》做男一，亦成功地吸納一大班師奶粉絲。戲中一個頗為神經質的大律師，好有戲味，又冇話太過過火。相比law霸走平民路線，展鵬的確輸蝕左d，但以戲論戲，有過之而無不及。

最佳女主角：胡杏兒《萬凰之王》
評語：時勢做英雄，杏兒算是其一，宮廷鬥爭戲從《宮心計》開始已經拍到爛，我唔否認杏兒演技都有不少進步，但戲中發揮尚未能讓人感到眼前一亮，始終蜀中無大將，先會成就她當上視后。不過都好過另一熱門陳法拉既。

最佳男配角：黃智賢《潛行狙擊》
評語：冇咩評語。但稱得上電視界中流砥柱，是時候給予肯定。
心水：林子善《怒火街頭》
跟李璨琛一樣，初出道在電影裡演爛仔，當今次演富家律司，起初覺得認為好搞笑，但其實驚喜度十足，與騰麗明的對手戲，亦見到出有為角色花心思，今年續集再戰過。

最佳女配角：陳敏之《怒火街頭》
評語：為套劇而導致跌傷鎖骨，是很大的付出，我亦深感同情，但名單之中還是有更合適的人選。
心水：黃淑儀《萬凰之王》
認識Gigi姐係源於《廟街媽兄弟》，比較適合演慈母那一類。但今次演皇太后，氣場十足，利用自己割腿一事，與光緒王和好，再設計把其陷害，以扶助其兒子稱王，可謂攻於心計。

我最喜愛的電視男角色︰羅力亞 (鄭嘉穎 飾)《怒火街頭》
評語：順應民意，亦係熱門之一，爛撻撻的角色係香港觀眾角度係幾受落，特別係演員轉戲路時，更加令人喜愛。

我最喜愛的電視女角色︰王思苦(胡杏兒 飾)《怒火街頭》
評語：順應民意，亦係熱門之一。

飛躍進步男藝員︰歐陽靖
評語：睇得出有付出努力，值得嘉獎。

飛躍進步女藝員︰馬賽
評語：外表太柔弱，所以起初在《女王辦公室》會被觀眾受落。一演其他角色即刻見晒底，外表局限未係致命傷，重要係連基本功都未打得好。
心水：黃智雯
跟馬賽一樣，初出演電視劇都係做d鵪鶉妹的角色，唔同既係，在之後不同劇種都有相當不俗的表現，特別在《居家兵團》的表現，更加令人留下深刻印象。

最佳節目主持︰草蜢《華麗明星賽》
評語：無。

最佳綜藝節目︰《華麗明星賽》
評語：其實都ok既，如果可以cut左第一part擺pose。

最佳資訊節目︰《水之源》
評語：無。
心水：《香港演義》
評語：我幾鍾意睇d講懷舊的節目，王喜主持都幾有喜感，但結尾都有d message帶出來，好好睇。但拎左另一個最具欣賞價值大獎，都已經唔錯。

非凡風采男女藝員︰黃宗澤、胡杏兒
評語：有冇發現上年個最佳專業表現大獎冇左，By the way呢個都係豬肉獎啦，頒畀呢對情侶都係想製造話題姐。