打少少前言先 :
應該係Big Man優先訂票果段時間啦，好友Iris突然係我上堂個陣一個電話打入黎，問我睇唔睇演唱會，仲話宜家排緊隊買飛。其實有諗過拒絕，因為驚紅館一overrun，冇車番屋企。但Iris都已經約我多次都推左，今次點都冇理由推架啦，所以只係短短幾秒內決定左其中一個人生重要的決定，就係應承Iris一齊睇Edmond演唱會。最初其實都係$180算啦，但之後交畀Iris一個睇演唱會有經驗d的朋友決定買咩位，最後係以$280成交。
咁之後我就提議埋不如睇埋戲啦，一來有goo啦，二來反正大家都係農曆年個陣開show，一次過滿足兩個願望啦。本身想話睇早場，但其後跟同事調更，所以早場睇唔成。
So far都有一齊睇套戲，先幾日仲諗緊去邊度睇，上好多網，又要睇完戲有個地方可以hea下先難搞，最終都係揀左尖沙咀海運戲院，價錢afford得起，環境都唔錯，完場都係行下商場(Shopping就冇謂啦 )
講番正題 :
其實一收工已經趕去尖沙咀，因為成日都驚靚位會畀人買左(其實睇4:45果場，未有咁多人買)，咁買完飛啦(學生優惠價$55)，就去左sogo底層food court食lunch，之後有行去海港城，又行去i square間HMV，一行完就差唔多夠鐘入場啦，又行番去戲院啦。
小插曲 :
原來海運D椅背有NUMBER，我睇都唔睇就坐落去，結果就坐錯位同畀人發現左，好瘢!!!!
2012我愛HK喜上加囍後感 :
我承認其實係冇咩劇情，同埋自己冇睇過那些年，所以果PART係笑唔出，只係笑d人講國語d口音；阿公唱叮噹都ok；goo其實冇乜笑位，義莊果part麻麻；最好笑係散場緊哥果段新聞報導囉，乜乜金XX金囉。但有一樣野係令我好激氣，片尾曲Iris話見到梁生個樣，但我睇唔到；之後出roller有梁生個名，我又睇唔到，真係......
好啦，完左上半場，下半場又未夠鐘，咁都搭西鐵過左紅磡醫肚先，話晒演唱會十一點幾先完show，唔食d野點得呀?
去左某商場的food court食野啦，食完又行番去車站買兩個蛋糕(唔係唔夠飽，係驚睇睇下頂唔順姐)。畀完錢，個cashier問「邊個開show呀?今日咁多人既?」直至佢望到Iris拎住兩張飛，佢就話「係囉，有人開show，d人拎住d飛!」，我即刻行番去Iris講「咁早拎出來仲乜?畀人見到啦!」
行入會場啦，兜左一大個圈先去到紅區，我地未夠8:15已經坐左入去，但d人都未入晒來，結果就係坐左半個鐘頭多d，先見到d燈暗左，然後開show。
一開場就係鼓手同d觀眾warm up下，要d觀眾一齊打拍子；打到咁上下，有3個人走左上台互相追逐，到其中一個「吊威也」被反彈到台中，Edmond就從音樂伴奏底下，以「Iron Man」的形象出現，為演唱會揭開序幕。
(呢件衫係用數以百計的扣針貫穿而成，Edmond試著都有整親)
01. PG家長指引 [其實我只識唱「我要你陪住我」呢句 ，但快版的version又好搶耳]
02. 大搖大擺
03. Big Man (with 24Herbs)
到左第一個換衫位，電視機就播一條片，簡單地描述小伙子變大男人的歷程，當中提及Edmond第一首hit歌《纏綿遊戲》；然後第二首《好朋友》；再到03年鯉魚翻生之作《七友》，雖然只係播片，但一響起呢3首歌，台下的觀眾都會觀乎起來。(我地都有XD)
接著，Edmond以一身白馬王子look，唱出一首又一首經典情歌。
 
(呢套西裝用數以千計的珍珠組成，幾配合經典情歌呢個環節)
04. 我需要的只是愛
05. 一百巴仙愛上你 [識少少，但d觀眾又聽得好high]
06. 移情別戀 [我第一次聽，但一路跟住字幕唱，又覺得好熟咁，好amazing]
07. 呼吸 [Bossa Nova，聽得好舒服]
08. 找我
09. 好朋友 (自彈自唱) [其實如果係用鋼琴伴奏會好d囉，電子琴比較適合做mini concert]
第2次換衫，今次唔係播片，只係有一班好似G4的西裝友行晒上台，兩位男高音台上演釋《大將》，之後梁生先係中間的舞台升上來，一身卡邦打扮，別具味道。
 
隨後，今晚第一位嘉賓亦都現身，就係已經有5個月身孕的楊千嬅，與Edmond合唱《滾》。開show之前，Edmond話要扶住千嬅上台，但正式個陣，Edmond條裙太長，自身難保，反而要千嬅扶番佢轉頭，唉!小心呀!
小插曲:
本來唱完《滾》就冇架啦，但千嬅又叫坐喺觀眾席有腳傷的Eason來個台上台下合唱《大激想》，但隊band冇預備呢個歌譜，Edmond建議改唱《火熱動感lalala》，但千嬅同Eason又唔太想，之後佢地就不斷同隊band夾番個譜出來，我不斷聽到千嬅唱「直直彎彎轉轉新傾向」一句成幾次，後尾第一次成功夾到，不過成個key就拉高左
Edmond都話唔好咁高音，之後仲有好多歌要唱，之後再來一次，今次都成功唱左半隻《大激想》，Eason亦好抵死咁話「聽晚的觀眾有福啦!聽日我都會喺度!d band準備定個key，聽晚再唱多次!」(但其實第二場千嬅冇來，所以都係第一場圓滿d)
10. 大將 (合唱團唱) [聽到「世界太過荒涼 個個錯愛一場」又覺得好熟咁，但個陣都未意識呢首係咩歌]
11. 艦隊 (with 合唱團) [成個畫面好氣勢磅礡，配合番首歌個melody，正!]
12. 滾 (with 楊千嬅) [Edmond話呢個係遷就版，但我覺得都好聽]
13. 大激想(with 楊千嬅, 陳奕迅) [試左好多次先成功，好好笑]
14. 一世一次戀愛 [至愛之一]
之後就到左我地兩個一路都好擔心的環節，呢part有SM feel，但效果其實又唔太意淫，反而真係做到Edmond之前話果種「視覺上的性感」，Good!!!!
(我覺得Edmond蒙上雙眼，造型上有點兒神來之筆，視覺效果同歌曲整體上配合得天衣無縫)
15. 傷了三個心
16. 女人用水造
17. 纏綿遊戲 [結尾dancer扯開件衫，但又冇扯爛，雖然全場嘩然，但不如唔好扯 ]
接著，終於到左鋼琴環節，還是彈鋼琴時候的他最迷人，但呢part最令我意外既係飛天鋼琴，Edmond話要演釋一首上年(2011年)對他意義重中的歌，我地都以為係唱一再問究竟，但一開口第一句竟然係「溝通機能全面退化」，笑晒，《懶音哥》呀!!!!! 你叫我點可以估得到呀? 呢個仲要係今晚的高潮位之一，真係意想唔到。
  
(呢套衫其實有好多個袋，因為用來畀Edmond袋觀眾d利是呀嘛)
18. 501
19. Music is the Answer [一首Edmond作的純音樂，好悅耳]
20. 重新做人 [至愛之一]
21. 懶音哥 (Piano Version + Original Version) [我永遠都會記得咁感動人心的懶音哥 ]
22. 隨時行樂
23. 太太! 太太!
又一個換衫環節，今次又有片睇啦，今次係播Edmond係後台的準備情況，但當個台升上來個陣，出現既係一個木箱? 當大家未知發生咩事的時候，有CAMERA MAN走上台用部機影入去，隨即響起音樂，Edmond就係入面唱《衣櫃裡的男人》，我果下覺得呢個CONCEPT好正呀，真係好有FEEL。
 
(好憂鬱的情歌王子)
差唔多都副歌個陣，camera man一步一步行開個木箱，木箱然後爆炸，全場嘩然，以為發生咩意外 or Edmond會從木箱走出來，但事實Edmond係從另一個機關走出來，我諗好多觀眾都被個木箱fake左，至少我地都係。呢個絕對係全晚最有驚喜的高潮位。
24. 衣櫃裡的男人 [驚喜位，呢個idea我好buy]
25. 不願一個人 [至愛之一]
26. 大男人情歌 [20周年紀念作，正!]
27. 一再問究竟 [2011年本人的金曲金]
尾二的換衫位，電視機播出的係多謝贊助商同台前幕下工作人員的片段。播畢，鏡頭轉去觀眾席superman, 台上的spiderman同bat man, 最後我地的「Big Man」就係台中以寶石俠的打扮，演釋一連串勁歌熱舞，中途Edmond腰帶發出火花，又再一次令到全場嘩然。隨後七小福出現牽起全晚的最高潮，但有樣野真係好搞笑，因為Dicky工作忙而冇親身來到現場，佢地就叫個dancer帶住印有dicky個樣的面具上台唱歌，果part真係好好笑。
  
28. 掯 + 八 [估唔到仲有機會聽到"八"呢隻歌，兩首歌玩味濃，但Edmond駕馭得好好]
29. Medley
- 夏日寒風
- 海市蜃樓 (with 蘇永康、許志安)
- 激光中、叮噹、傾斜、信自己、Stand Up、喜喜洋洋 (with 蘇永康、許志安、草蜢)
唱完之後，五子竟然叫Edmond台上換衫，全場當然起哄啦，成為紅館第一位台上換衫，一路有bom bom棒聲伴奏的男歌手。
隨後，五子談及對Edmond的感受，真係好感動，其中蘇老闆提及「梁漢文樣樣野都好努力，偏偏唔努力造人!」，全場又起哄啦! (Edmond真係要生龍b，就要努力d啦!!!)
到了closing，Edmond向觀眾演繹最後兩首歌曲，第一場演唱會完美閉幕。
30. 愛與情 [Iris最愛之一]
31. 七友 [香港流行曲經典作之一]
------------------------------------------------------------------
後話：
Edmond早前於weibo公開話因為今次演唱會挑選了大部分華星時代的歌曲，版權費太昂貴而無法推出DVD，但其實今次有好多人係冇辦法欣賞到今次演唱會，包括一d已經買左飛，但最後拎唔到通行證的內地歌迷，其他海外歌迷亦都係一樣，希望金牌唱片同東亞唱片之間可以好好溝通一下，始終一個歌手能夠走過二十個年頭，係得來不易的一件事，只得兩場亦係講唔過的事，有關單位如果能以樂迷為首，都應該會明白今次演唱會的重要性何在。
|
