最後四個CYCLES

今日放學去左港島個邊做個市場調查

坐左兩個鐘收左$350做報酬

係爽既

去到走個時同個一齊做調查既女仔一齊走

佢話佢今年中三

讀真光

傾下傾下我問佢有冇諗過將來做D咩

佢話佢打算大學讀LAW

我就話你咁細個就諗到咁長遠啦

佢話其實唔遠架都係幾年後既事

之後佢就分享佢自己出去玩個D模擬法庭辯論

佢仲同我講左好多關於法律上既野

令到我大開眼界

其實我心入面好佩服呢個小妹妹

咁細個就好清楚自己想做D咩

仲付諸行動去實現自己既理想

而我到而家中六仲係一舊雲咁唔知自己想做D咩

真係慚愧

其實上到黎中六眼見到大家都開始發力

我都知自己讀到大學既機會真係唔大

而我又清楚知道屋企人唔會比錢我讀副學士

我冇選擇

一係大學

一係踏入社會

但係呢個時候我仲係唔想面對現實

得番百幾日就到公開試

鄭子祺你只係得番百幾日時間去搞清楚你想點

諗清楚你自己將來條路要點行

希望睇到呢篇廢文既人

未搵到理想既可以及早搵到你地既夢想

搵到既可以堅持你地既理想

共勉之

平日如果冇咩做我都唔會上黎

但呢排發生左好多事好想可以搵個地方可以發洩下

話咁快中學已經讀到最後一年

我真係好想可以畢業前一班6B可以大家和和氣氣咁相處

但發覺已經係冇可能

有D野做左,講左係冇辨法可以番轉頭

我睇住一對識左好多年嘅好朋友反目

睇住呢個班矛盾愈來愈深

我真係好攰

自問我呢兩年黎我為左呢個班花左好多心機

但到頭來換黎嘅

只係失望

人地嘅唔領情

晚晚訓之前我都會諗我為呢班做咁多野係為左D咩

係囉

為咩呢

呢個時候我真係答唔出

慢慢我而家開始變得好唔鍾意番學

唔想再戴住假面具

去同一D唔鍾意自己嘅人嬉皮笑臉

扮熟扮Friend

呢樣真係好辛苦

呢個時候我好後悔入左呢班

後悔F.3唔再努力少少揀m1m2

到時入左一班只係識讀書嘅

就唔會有而家呢D煩惱

我而家只係想快D考完DSE

到時大家就會各散東西

唔使再睇人面色

唔使再委屈自己

邊個真心對我

邊個想我死

我真係知

去到呢個地步

我諗呢個應該就係最好嘅結果

 原來3年冇打過qooza

岩岩突然醒起自己有QOOZA入黎睇番以前自己打過D咩搵到好多回憶

年少多好沒有煩惱