Day 1 & 2: 機場 > Anantara Vacation Club check in > 訓覺 > 早餐 > 行商場 > 沙灘 > 酒店游水/曬太陽 > Lunch@酒店房 > 繼續曬太陽 > 酒店借單車踩 > 沙灘睇日落 > dinner > 回酒店游夜水
係香港夜機去,去到當地都11點幾,搞埋過關拎行李差不多11點45分,機場外面都有好多人舉牌接人,我好快搵到我地間酒店既員工,佢都拎住一疊接人名單,我地報到後佢就CALL左架車來接我地,安排我地上車後佢就繼續等其他人,我見佢都有幾個PARTY要接。
去酒店既沿途都是黑媽媽,馬路上間唔中先見到一架車,而沿路都冇乜建築物,上網見到有人分享都話呢邊係好荒蕪,真係無錯!
機場去酒店大概20分鐘左右就到,佢係大路轉入一條小路,行左一陣就到酒店門口......
去到接待都有人CHECK IN 緊,一坐低就話有野Offer比我地,可加2000b/1晚將間房轉做pool villa,我地話如果比錢就唔洗了,於是就say no,一來有d突然,二來之前係香港搞接送個問題都搞到咁,唔係好想再花錢比佢地呢間集團。點知接待個員工同另一員工講左2句就話想我地住得開心d, upgrade pool villa可以free比我地.....咁如果free既梗係住啦 .....但之後要用credit card比4000b deposit, 搞到我心蘿蘿攣,咁岩如果2晚upgrade又係合共4000b,心驚緊check out時會唔會唔認數收返我upgrade房錢。又驚自己聽錯佢係咪最後話free.....都唔理得咁多,當時都12點幾,跟著就坐架golf車去我地間房,其實路程都唔遠,只不過夜媽媽,黑炆炆,又拎住行李,又攰.....眨下眼就到左我地間房.....
wow....個門口好大喔! (由於CHECK IN 時已係夜晚,呢張相係第2朝影既)
見到呢間獨立VILLA, 真係好興奮, 但又要按奈住自己既興奮, 酒店員工幫我地搬行李入屋,教我地點樣開門,簡單介紹下間屋既設施......間VILLA真係好鬼大,有2間房,2個廁所,勁大個OPEN KITCHEN,泳池,仲可以係房門直接行出泳池......真係無諗過可以唔洗錢住到一間咁正既VILLA.....
廚房用具十分齊備,可以自己買野返來煮。
      
由於酒店都較為偏僻,所以呢2日主要都係HEA下咁,起身就去食個早餐,酒店附近周圍行下,行出海灘,跟住係VILLA游下水,食個ROOM SERVICE, 再出去踩左陣單車,就去附近唯一一個商場食晚餐。其實都真係好HEA.......不過值得一讚,呢間酒店既早餐係不錯,食物種類都算幾多選擇!
剩係麵包同麵包醬料都有十幾款揀
 
  
    
呢度就係食早餐既地方......而這裡亦是酒店內唯一一間餐廳,夜晚有時會有自助海鮮餐,亦有散叫PIZZA個D
原本我地就係住係餐廳對出呢幾座APARTMENT,結果就Upgrade左去pool villa.
酒店門口
酒店對面唯一商場, 有幾間食市,買野既鋪頭,地庫有間細細地既supermarket
今日好好陽光,沙灘唔多人,水清沙幼,好鬼hot.....真係要快d返villa游下水先.....
 
由於之前係交通接送上的安排失誤,酒店賠償左1000b coupon比我係酒店用,可以用來食野或做spa, 咁我就用來叫左room services, 第一次享用room services服務,仲可以係池邊食lunch, 真係爽丫!
游完水就出去借單車,係酒店踩左一陣,踩去沙灘睇日落,睇完日落去還車就去商場開餐了。
 
係房都睇到日落
揀左呢間餐廳,一個門口,有2間餐廳,廚房相通,所以可以叫2邊唔同既野食,我地揀左叫泰菜為主,其實呢間餐廳既食物質素唔差,但服務就........間店都坐唔滿,但速度超慢....走左既客張檯又冇人執野......我地原本叫左4樣野,沙律來錯,要再整,結果最尾埋單都冇來,我食到差唔多走既時間都仲有人入來,間shop只坐滿一半都唔夠,但侍應就同d客講,而家入座起碼半個鐘先食得 真係唔明解........
  
呢個係木瓜沙律,但我地叫既係芒果沙律,叫佢換返比我地,結果食完都冇理返個岩既
最終唔夠飽,要食甜品填肚......
食完返酒店hea 下,執行李,明天check out 了
走前再游過夜水,明早游多次早水,就要走了.......
呢度咁僻靜,冇夜生活,好彩今晚有波睇, 食下宵夜,飲下啤.....
明天call左車12:30 來酒店接我地去芭東市,要好好珍惜埋明天係酒店既時間先......
|
