DAY 2: TOYOTA取車 > 太宰府 > lunch@季樂鳥栖店 > 鳥栖 TOSU PREMIUM OUTLET > dinner@中州 > 天神藥妝店 > 住西鐵博多

我間酒店房望出去係見到jr列車,冇得坐,有得睇下都好........同時幾架列車,有d應該係等緊埋站

今早既早餐係博多站裡面一間麵包舖度買,專賣牛角包, 個名叫" il FORNO del MIGNON" ,佢既牛角包係用g去計價錢,不是續個包計,有幾種味,好味!朝早都好多日本人排隊買

買完早餐就去TOYOTA取車, 約左9點鐘取車, 我地今次租左架7人油電車,因為只係其中一晚住由布院,其他時間都只係載人,所以一架車就OK,如果要載埋行李就一定唔得,呢度舖面唔算好大,去到咁岩有香港人係度辦緊手續,等左一陣就到我地,我地今次有3個司機,每個有份揸車既都要比國際牌影印,登記完資料等多陣就去停車場取車,去到當然會教下我地用個GPS,之前去過沖繩有d經驗,基本上大致都好易用,同埋CHECK下架車,tick底左幾個花左既地方,就可以出車。今次呢架車都幾新淨,最後個排就只適合女仕坐,男仕應該會逼,整體大致ok.....租車費係32100yen包埋保險,租5日,取車9點,還車晚上8點

今日第一站去"太宰府",由取車點去太宰府大概半個小時左右,冇塞車,好快就到lu,太宰府附近有個大停車場,今日十分好天,但我知今日香港有黑色暴雨,除左自駕,搭車來都好方便,呢度有個太宰府車站

未入到太宰府之前,會經過步行街,步行街2旁有好多不同特色既舖頭,有買梅枝餅,雪糕,飲品,STARBUCKS, 龍貓度店,手信店,慢慢逛完才正式進入太宰府

呢間梅枝餅好好味!包裝又靚,暖立立,而家見到都好想再食

來到太宰府必到呢間STARBUCKS朝聖,好特別既設計,有人說像一雙雙木筷子,今日天氣非常熱,所以大家都叫左杯STARBUCKS飲,我真係好鐘意飲STARBUCKS,去到邊我都要飲返杯

入去前先洗手,再飲一啖水沖一沖口,吐出,要到廟前拍3下手(好似係咁)

來到呢度,當然會有好多御守買,有求學業用的,有求身體用的,有開運用的,有交通安全用的,我地大家都有買

係太宰府大概逗留2個鐘,出返步行街買埋手信就出發去食LUNCH了,今日食LUNCH既地方是位於烏栖既"季樂",出名食佐賀牛
由太宰府過去大概30-35分鐘,我地會行收費道路,去季樂食飯最好就預先訂位,尤其晚上,本來我都諗住下午都先訂位,但到步第一日忘記找酒店前台幫我訂位,所以都係博一博去到睇下有冇位,好彩都有位

下午佢有LUNCH SET, 亦有散叫,每個LUNCH SET都會有前菜,飯及飲品,我地就叫左3個SET再另叫左個6900円既牛

個佐賀牛不錯,不過比起沖繩既琉球之牛,我覺得沖繩個牛好食D

呢一餐都幾滿足, 盛惠10970円,食完可以去隔離有個街市行下,個度有生果買,我地行左一陣就出發去血拼了

今日第2個行程就係去TOSU PREMIUM OUTLETS血拼,由季樂過去好快,大概5-10分鐘車程就到,呢度有好大個免費停車場泊車,今日都有d full full 地,但又唔算好多人,可能夠大,d人分散行,所以冇逼既感覺, 來到呢度梗係分頭行事,見到好野大家會係whatspp通知一聲,係度會預計逗留3個小時.....最終我地由2點幾行到5點左右

呢度除左shopping都有食野既地方,熱熱地又嘆返杯ice-cream先

各位團友都滿載而歸,人人有份

戰利品放滿成個車箱

shopping完就返博多食晚飯,今日本來plan左去釣船茶屋,但又係忘記到步當天叫酒店前台幫忙訂位,我地只係今朝出發前交低比前台幫忙訂位,當然唔知佢會唔會幫我地訂,咁唯有又係博一博,因怕酒店真係成功幫我地訂左位,而我地又no show既,會影響香港人形象麻

所以去到我地都冇直接入停車場,先入去問下有冇我地既訂檯,結果冇,而且今晚full booking,就算夜d食都冇,當時我地去到都只係6點幾,諗住book 9點幾都話冇,咁冇法,唯有即刻book後日再來食,因為明天我地要去由布院住一晚,後天食會比較好,最終我地揸車去返中州個邊食,周圍行,周圍搵野食,最終搵左間上樓既,有串燒個d食,不過不失啦,又唔算係好好食個種,最得意既係每檯有一部自助落單機,係日文,所以有d都係估估下

食完又行下中州及天神藥妝店........跟住就揸車返酒店,我地訂既酒店全部都有泊車服務,點知我地太夜返去,連酒店既車場都close左,好彩酒店對面就有個多層公眾停車場,而又有夜泊,咁雖有泊入去,結果泊入停車場既收費仲平過泊酒店,所以之後我地都係泊公眾停車場,冇泊酒店, 酒店一晚要1500円,車場夜泊2000-0800都係700円,就算我地9點先出車都係比多300円,total:1000円,估唔到冇啦啦又慳左

今日既少少戰利品