早排上網見到"拯救遺棄寵物中心"徵義工,為400隻毛孩準備豐富大餐,同蝦子餅二話不說就報名參加,成日都好想去寵物機構做義工,但就成日就唔到時間,難得有機會就不能錯過。

當日既活動時間係: 11:00AM-4:00PM

地點: 流浮山上白泥31號 (但Google既地址係唔岩,搞到去到周圍搵都搵唔到,最終就咁打上白泥,跟住去到自己搵先搵到,正確位置大概深圳灣橋橋底)

自備工具: 水鞋/圍裙/手套 (其實以上用品都是建議使用,當然你可以選擇唔用,只是因為要洗倉,著水鞋會方便D,唔怕弄濕鞋同褲,我見有些義工都只穿短褲拖鞋就OK)

起初以為只幫忙準備食物,派食物,去到原來都有其他工作要做,例如洗倉......

今日義工人數都不少,都有差不多40人,我仲帶埋姨甥一齊去

一去到就幫手洗倉,我地跟了一位有經驗的去其中一個倉,這個狗場其實都幾大,有一邊就用左貨櫃做了幾個倉,大概7-8個倉,每個倉都有個大閘,倉裡面有10幾個小倉,每個小倉裡面有幾隻狗,而外面都有一些獨立小倉,獨立小倉最多1-2隻狗。每洗一個倉,就放裡面既狗出來,佢地都會好開心奔跑出來,咁呢個時候我地就分工合作去洗地,執屎,掃地,換干淨既飲用水,洗好後就叫返d狗入去,大部分既狗都會自動自覺返入倉,有d狗仲好怕人,你幫佢洗倉佢都唔敢走出去。唔好睇隻隻都係唐狗,但佢地其實好細膽。

呢隻狗好細膽,我地洗地佢都唔離開

雖然佢地都係大部分時間困係倉裡,但在這裡起碼有瓦遮頭,可以安心訓覺,有飽飯食,得閒又有義工來探佢地,唔洗在外面流浪,有機會比車車死,受傷或比人做狗肉。

洗完倉後,就幫手準備食物,係我地洗倉既時候,已有部分義工一直幫忙整食物,拆雞肉,今日開大餐,比平日特別豐富,第一次見到要為400隻狗去準備食物既份量是如此驚人,幾大桶飯,有些白飯裡已混了狗糧或雞肉,再溝肉碎加濕狗糧,攪埋,剩係裝飯都要輪流做下,因真係幾攰,準備好就由職員帶領去分配飯,因為有D狗需要食藥,要將藥混入飯中,食完就要回收飯碗,有義工負責清洗飯碗,食完飯原來又再一次簡單清洗狗倉,其中一個原因係好多時食完飯狗狗就會開大,咁就要清理多次會好D,其二佢地有時會食到成地都係飯,咁就要沖乾淨,避免食物味道吸引老鼠等等,真係唔簡單,我地當天差不多40人都搞左大半天,很難想像平日得幾位員工要用幾多時間去做以上既工作。

大家努力拆雞肉

呢邊就努力洗碗中

開飯LU

其實場地本來都有貓,同場主傾談下原來本來有80幾隻貓,因為好多比人領養了,現在只餘3隻,當然聽到呢個真係好消息,有咁多貓可以有個家,無奈既係貓比狗易入屋,所以場內既唐狗較難有人領養,尤其香港地,不過無論貓定狗,都希望愛寵物既人都用領養代替購買。有好多狗同貓其實都好乖,好值得有個幸福既家。

做左幾個鐘頭都真係幾攰,因為當日天氣非常熱,不過仲未去到最熱,如果夏天30幾度真係好難頂。

整體感覺這狗場都幾大,地方算整潔,雖然咁多狗,狗味都不算強烈,絕對是可接受既程度,可以想像負責人都係細心去打理,真係忠心感激慈善團體既付出。

呢隻狗令我印象好深刻,一直見佢都瑟縮一角,很害怕既樣子,佢個樣都好慘咁,不知道在他身上曾經經歷過什麼!