成日都想行山,但一假期天氣就不好,天文台一直預告今日間中會有驟雨及雷暴....心諗,唔係丫麻....
好彩最終都可以出發,雖然天色都係灰灰暗暗,有煙霞,但天氣都幾熱,如果有埋太陽應該會仲辛苦
今天約左幾個朋友一齊行,係樂富地鐵站回合,再行上去天馬苑,係呢段路我已經出哂汗
1:15分正式係獅子山公園燒烤場出發,係度去埋洗手間,濕好毛巾,係BBQ場有條小路開始上山
  
回望落燒烤場
   
開初一大段樓梯不停上,行左一陣都要休息下先,天氣太熱,一下子揮發左好多汗水,有D暈暈地tim
行行下見到一舊大石,又坐低抖下,呢度個景觀都幾開揚
再行左不遠就到左回歸亭,呢度有個涼亭比人休息下,有幾條分叉路可以揀,有獅子山,有畢架山,有望夫石方向等, 同埋都幾多馬騮係度搵食,一見拎住袋就昅實,有d仲幾惡死,我地不以為意咁拎左包朱古力豆出來,有隻馬騮突然係樹上跳跳跳咁跳過來,仲由左邊樹飛去右邊樹,好似想撲埋來咁,仲張哂咀兇我地,個刻真係以為佢會撲埋來,好驚,最後佢再飛走去第2棵樹既時候仲抓到我地其中一人,好彩冇抓傷
  
 
係登山既路都幾水涉不通,因為太多人,有時要等落山既行完先到我地上
 
所以我地都放棄左上獅頭,直接去獅身
 
沿路都會見到呢隻白色小花
   
雖然有個懸崖牌,但個個都會行出去,出邊應該係獅尾部分,有d人仲好奇怪咁係山下面既一條草叢路行上來,我地係獅尾逗留得最耐,係度傾計,傾傾下傾左個泰國之旅
呢隻狗狗都係同佢主人係懸崖牌出面既一條路走上來,我都幾佩服帶狗行山既人,沿路都遇到幾個
傾傾下都要起程了,因我地仲要去望夫石,我地冇揀獅頭條回頭路落去,揀左獅尾個邊落,向返畢架山向走,中間走左一小段麥理浩徑,要出返回歸亭,由回歸亭向望夫石方向走,途中經過電塔及機槍堡
  
由回歸亭去望夫石大概1.4公里
遠望望夫石,望夫石個位置都幾細,同埋遠望先像樣,行到埋去就唔似
我地到左又坐下食下野休息下,跟住就落山lu
差不多到山腳遇到溪澗
 
 
走左大概30-40分鐘,就到紅梅谷燒烤區終點站,係度休息下,拉下筋就行落去隆亨村搵野食
如果由紅梅谷呢邊做起點,上望夫石大概40分鐘
行緊落去隆亨村時遠望有幾間冬菇亭,一於去個度開餐,當時只是6點鬆d,間餐廳既坐位好似已經好緊張咁,好多檯比人book左,不過最後都安排到座位比我地
可能大家行左5個鐘已經好肚餓,竟然叫左10樣餸
今日行山人地行3個鐘,我地行5個鐘,因為大家都好耐冇行山,而我地又好hea遊,剩係係獅尾傾計都傾左好耐.....
今日真係流左幾多汗,行左10幾公里,消耗800卡路里,超爽,期待下一個行山旅程!
|
