5 MAR,2016 < 晴 >

DAY 1 : 小港機場 > 酒店 > 壽山動物園 > 南華觀光購物街 > 美麗島站 > 酒店 > 新堀江 > 凱旋夜市/禾豐夜市 > 三多商圈 > 酒店

今日搭8點鐘機,5點幾已到機場,由於做左網上Check in,只是辦理寄行李,所以都好快,今次可以坐返網上check in 時所選既位,搞掂好就入去lounge食d野,休息下先。可能時間早既關係,lounge都好少人,好易搵位坐,食完既時候,lounge就開始排長龍安排入座了。
由於我地要去北衛星個邊上機,所以預早d時間搭接駁巴士過去。

   

眨下眼準時上機,去程機都有d滿,今次係坐細機,3-3既格式,我地隔離都冇人坐,前面個行都係坐左一個人,都不錯,好耐冇坐過有飛機餐食既航班(因通常坐廉航),不過其實都飽,所以只係食左少少米粉,包餅食左一包,另一包袋住先,去高雄真係超快,飛機餐都未食完就話仲有15分鐘就到........

  

 可能早機既關係,過關都好快,過完關去完個廁所,行李都到左,好快拎埋就去大堂,出到外面都好靜,冇乜人,咁就第一時間去中華電訊出電話咭,比左passport影印,填張表,簽個名就搞掂,用iphone一插咭就用得,好方便。隨即搭捷運去鹽埕埔站,去酒店放低行李先。

   

  

成個捷運真係靜到爆.......係香港真係唔會見到一個車站係咁少人.....

由機場搭去鹽埕埔都好快,車費NT70,出到地面真係感受到個種熱,由車站行去酒店大概10分鐘左右,去到未有得CHECK IN,先放低行李及換衫,真係太熱,要換返短衫短褲先得......

換好衫就出發去第一景點"壽山動物園",係酒店向捷運站行,其中一個出口對出就可搭巴士去動物園,幸好有個超強方向感既蝦子餅,要搵車站冇難度,車站就係銀行出面,我地第一個係度等車,等下等下都越來越多人,多數都係本地人,坐既係單層巴士,收費NT12位,車程都好快。眨下眼就到。

    

 呢個動物園真係好抵玩,NT40入場費,慢慢行可以行2個鐘,好岩一家大細,我見到好多本地人一家大細家庭樂

行行下動物園都有D餓,但園內食物唔岩食,就食左飛機餐個包餅頂住先,跟住就搭返車出去,因為打算先去美麗島站影下相先,所以會搭去"中山一路口"站落車,不過回程要NT15位

落車後發現自己對布鞋側面爆左個小口,今日先第一日,唔掂啵,買對鞋穩陣D,突然間去邊度買鞋好????....就係呢個時候,見到前面有條購物街,叫南華觀光購物街,條街好似香港既花園街咁,有賣鞋賣衫,好彩係度搵到岩既布鞋,咁就2話不說買啦,仲一口氣買2對,以防萬一 ^^ (乘機買多對),由於掛住買鞋,唔記得係度影下相

買完野就搵食醫肚,其實都冇IDEA食咩,行到邊食到邊,所以去左間老店度食,見到都多本地人食,咁就試下,叫左個排骨面同排骨湯,又幾好味WOR,呢餐食左NT130

食完野就慢慢行去美麗島站,真係估唔到一個站都成為左景點,呢個站真係幾靚,不斷都有人係度影相,相信呢個站係算多人既捷運站,除左夠特色外仲係一個大站,轉線站

影完相就入閘搭捷運返酒店先,因為去完動物園實在太熱,要返酒店梳洗一下先

其實呢間酒店整體係唔錯,不過有d覺得呢間酒店都好多強國旅行團入住,因為第2日早餐勁多強國人,又見到有大巴來接旅行團d人,同埋唔知點解d升降機設計到黑媽媽

沖涼同去廁所既地方係分開,休息到大概17:45就出門口了,自遊行就是這樣好,隨時調配行程,行得攰行得熱又可返酒店休息下先再出發今晚先去新堀江個邊行下,由鹽埕埔搭捷運去中央公園站NT40/2, 先去九乘九買文具,D文具真係好鬼抵,忍唔住買左好多.....跟住再行去新堀江既中心地帶

  

好特別既餐具,佢將刀叉匙集於一身,但我試過不太WORK ^^ 

係新堀江行完食完就準備去凱旋夜市/金鑽夜市, 係中央公園站搭捷運到凱旋站NT40

去到先係捷運站見到原來已經冇左金鑽,改左叫禾豐夜市,之前我知道有免費接駁巴士可以去,唔洗行,上到地面又唔見有牌指示邊度等車,觀察左一陣蝦子餅話不如行過去,遠望又好似唔係好遠,咁就行啦.......其實慢慢行都OK既

點知去到真係嚇一跳,超級失望,成個場真係幾大,但就只有1/5 左右既檔口開左,好多都冇開,超靜,簡直覺得快要倒閉既狀況,但明明指示今日星期六係營業架!!!!點解會咁架!!!十萬個問號,失望到相都冇影,剩係影左個凱旋夜市牌,跟住就行去禾豐睇下,其實2個夜市只相隔一塊空地既位,禾豐係細d既,都係拍烏蠅既狀況,完全冇氣氛,行左一陣都走了。白白浪費左專登走過來......結果乜都冇食到.....