6 MAR,2016 < 超熱 >
DAY 2 : 酒店早餐 > 旗津島 > 海之冰 > 打狗領事館 > 駁二 > 酒店 > 冒煙的喬 > 巨蛋 > 瑞豐夜市 > 酒店
大概8:30就去食早餐,唔知係咪因為有旅行團,餐廳都幾多人,要排隊等入座,在附近都有不少強國人。安排好座位就去搵食,都幾多食物種類選擇,食物都不停refill,不過第二朝食就唔同哂,唔知係咪少左d團既關係,放出來既食物種類都少左好多,有d款式直頭冇左,十分奇怪!!!!而第二日係冇人排隊,自己入餐廳自己搵位。
         
食完早餐就出發去旗津島,本來應該行去西子灣,蝦子餅見近近地提議搭的士,酒店外面都經常有的士經過,好快找到車去西子灣,車程中同司機傾下計,知道我地去旗津,就介紹我地去旗津食海鮮,我地又問下佢打狗領事館由碼頭行過去係咪好近。司機都非常nice.....眨下眼就落車啦,咁岩去到有船係度等人上船,咁我地都拿拿臨買飛上船,好搞笑佢有個錢箱擺係度比人入錢,但就冇人看管,其實你入少左佢都唔知,當然我地又唔會咁做啦,因為都只係NT25一個人,普通人既入口同機車連人既入口係唔同既,好耐都未試過搭呢種載人載車既船,揸機車及單車都是在下層,船程都非常快,大概5分鐘左右就到。
去到旗津可能時間尚早,當時大概10點鐘左右,主街道有d舖頭都未開,有d都只係準備開舖中,我地行左一陣主街就去租單車,今日主要都係踩單車周圍遊覽下,好多人來到都會租單車環島遊,有單人車,家庭車,電動家庭車都有,唔洗自己踩,我地每人租左部單人車,要放低一本passport比車舖,租單車一架NT100, 佢既時間係晚上7點前還車,真係超抵,佢仲比左一個單車鎖我地,試好單車就出發了.......
     
第一個景點去旗津燈塔,不過上燈塔係唔比踏單車,燈塔入口處有好多地方比人泊單車,咁我地泊好車就行上燈塔,今日高雄既天氣真係超級熱,我好失策咁唔記得帶防曬!!!!
遊完燈塔落返山,對面就係砲台,不過我地冇上,因為太熱,見到條斜路都唔算行,同埋我知道上面好似係冇左支炮,得個台,咁就唔睇啦....準備下一景點之際
蝦子餅踩踩下發現架車前面冇左Break,懷疑之前有人係我地隔離拎單車時撞到我地架車,撞甩左連住剎車既線,跟住又踩返去車舖,好快手幫佢整好,又出動過
跟住就經踩風大道,去左星光隧道......穿過星光隧道出面就係海,點解叫星光隧道?我估係因為隧道既頂部其實痴滿了發光既星星並拼砌左12星座出來,但可能我地係朝早,隧道外既光射左入隧道,所以我地見唔到佢螢光個樣,隧道內2邊都有椅子比人坐,可能比人觀星座
       
睇完星光隧道我地繼續沿踩風大道踩,一直沿著海邊踩,踩踩下有2座特別既建築物,原來係彩虹教堂,而呢2座教堂都會外租比新人拍照,如果有活動就冇得走埋去影,而每日4:00-6:30PM遊客都禁止進入
再繼續向前踩,我地既目的地係風車公園,去風車公園既途中見到隻大螺,真係好大隻.......隻螺裡面有喇叭播住海浪聲
差不多到中午時間,終於去到風車公園,這裡除左風車,仲有好多由馬賽克砌成既海洋生物,好可愛,在這裡除左曬都幾大風......
遊覽完返轉頭去黑沙沙灘玩下先.....呢度D沙係黑色架......D沙都幾柔軟
由於得2個人,我地冇去的士司機介紹既海鮮市場,我地踩返出市集個邊,而家出到來就多人左好多,條街熱鬧左好多,我地又將架單車泊埋一邊,係度掃街,買野飲,買手信等等
食完野就拎返架車去還車lu....由食街踩住架單車去還車真係有d難度,又多人,又有機車,又有其他單車,真係要小心咁行.....順利還車拎返passport就搭船出返去鼓山碼頭lu......估唔到呢個鐘數出去既人咁多,要排長龍,出返去又見到勁多人排隊入旗津,電單車條隊超長,好彩我地早入去,避過了人潮
返來鼓山碼頭,我地又繼續食,去食冰"海之冰",由碼頭行過去好近
海之冰既食物種類超多,真係眼花撩亂,最終我揀左個個好似食緊紅豆冰刨冰,咁熱既天氣下食碗冰,爽丫
食完冰我地又行返去鼓山碼頭,因為我地要經鼓山碼頭條橋行過對面去打狗領事館,其實西子灣站有車搭過去,不過我地又係呢度附近,而蝦子餅又話唔係好遠,咁就行下啦
行下行下就到左個入口都唔知,因為原來蝦子餅睇左個入口唔係呢度,係遠d,經Z型樓梯上去,唔知道原來有2邊入口,去到問清楚呢度入得,咁梗係入啦,雖然避過了Z型樓梯,但其實呢邊都要行石級上山
周圍行下參觀下,影完相就去食TEA.....無錯,又食,來到呢度,梗係食返個英式下午茶,
係領事館裡面有間餐廳,有個好漂亮既"威廉王子英式下午茶",個名好搞笑,2話不說,揀個海景位先
由於我地來之前已經不停食,成個TEA真係食唔哂,食剩個D打包左返酒店
入場卷有個抵用卷30元可以消費,咁就去買左2杯冰茶飲下,又幾好飲WOR,咁又去買左3罐冰茶粉用來自用同送禮,一勺粉加凍水或熱水都可沖開來飲
  
買完野飲就行返入口離開,呢個時間就多左好多祖國人,嘈嘈閉,大聲喧鬧,又冇禮貌,真係好得人驚
  
我地冇揀返行路出去,入口對面有2架巴士可以出返去,因為我地打算去駁二行下,所以搭左橘1出去駁二,好彩等左陣就有車,我地上車自己係度講第幾個站落車既時候,好好人既司機就問我地去邊,我地話駁二,佢就話到站叫我地.....真係太好人了,有時搭下當地既交通工具,體驗下都幾得意
到站落車,司機真係叫我地,原來成車人都係駁二落^^
來到駁二大概5點鐘,呢個時間既駁二超多人,除左有藝術品之外,唔知因為今日係星期日定平時都有,會有d手作小攤檔在這裡擺賣,好多唔同既手作人都拎自己既製成品出來賣,對於我呢種都鐘意做手作野既人來講,只要我睇岩,價錢唔太貴,我一定會支持,最終買左個手製銀包,整個銀包都是店主自己車,d花是自己繡,我專登買來去旅行用,同埋買手作野從不講價,因為自己玩手作,知道做每一件手作都需要好多心機做的。
                       
呢2隻狗狗好得意,動作表情好一致
     
其實整個駁二都非常大,有賣的,有食的,有藝術的,有餐廳,真係認真花半日都未必走完,由於我地明天還有時間,有一部分就留待明天才睇,由於駁二好近酒店,所以又回酒店休息下先,放低d戰利品......
返到酒店先發現....原來我今日係旗津曬傷左,對手超紅,其實我地2個塊面都紅哂,好似去沙灘玩完一日,曬完太陽個種,都係我唔好,明明帶左太陽油,帶偏偏唔記得袋起身拎出去.....
係酒店hea左9個字左右,又出發啦,今晚晚飯去巨蛋站個邊間"冒煙的喬"開餐,食墨西哥野為主,但都有其他菜式揀,由鹽埕埔搭捷運過去NT50/2位,餐廳既外型非常特別,成座城堡咁,內裡餐廳既佈置都好特別,我地叫左個漢堡餐,一個PIZZA,仲有一碟炒通菜,食物質素不錯,美味!
     
              
尋日就是在這間餐廳食CAKE,原來這邊都有分店,係高雄都有好多分店
有間24小時百貨公司
台灣D SHOP既舖頭名都幾搞笑
食完就慢慢行返捷運既另一邊,巨蛋購物城,望下巨蛋體育館,入左購物城行個圈,呢個商場主要都係賣名牌子既野多,行左一陣就走離開,向夜市出發
呢度附近有個瑞豐夜市,係呢度真係感受到咩叫夜市,同尋日個個差天共地,雖然我地其實係食唔落,但都要來見識下啦
見到D美食都冇想試既衝動,因為我地真係好飽
行左一陣因為好攰啦,決定返酒店LU,返到酒店都11點,準備執好行李,明天就要CHECK OUT離開,準備向墾丁出發。
|
