8 Mar,2016 <晴>
DAY 4 : Check out > 0940-1015 橘子早餐 > HOT墾丁買門票 > 1035-1045 出火 > 1100-1215 佳樂水 > 1225-1245 港口吊橋 > 1245-1330 轉角食堂LUNCH > 1400-1430 鹿境梅花鹿生態園區 > 1500-1600 恆春古城 > 1610-1700 維多利亞騎馬 > 1720 岩手民宿CHECK IN > 睇日落 > 2000-2100 貴族世家牛扒 > 2150-2200 龍磐公園玩煙花 > 民宿
今日天氣都好好,早上既船帆石都好漂亮喔!因為民宿唔包早餐,今早自己去搵早餐食,之前上網見到有人介紹橘子早餐好似幾唔錯,一於今日去食,由於食完早餐會去佳樂水那個方向,所以一早順便check out左,跟住過隔離民宿說聲我們已到,會大概5點左右回來取房。
 
民宿門口,隔離都有食早餐既地方
橘子早餐只開上午時段,逢星期三休息,所以我只能就到時間今天來食,食物整體不錯,很喜歡那個蛋餅,很好食。
    
食完早餐便向佳樂水出發,途中會經過HOT墾丁門市,順便去買騎馬及海生館門票,在這裡買會比去到景點買便宜一點。例如30分鐘野外騎馬這裡買NT850,原價NT1000,海生館NT410,原價NT450,如果買左票沒有用仲可以退票。
這就是陪伴我們這幾天既戰車,車尾箱都幾寬,可以平放一個喼,我地幾日都係將喼放車尾,只取需要用既東西上民宿,因為民宿都在3樓,不用每天拎喼上上落落
  
買完票繼續出發,中途會經過出火,又睇下早上既出火係點先……..昨天夜晚來都看不清週邊環境,早上的火仍然在燒…….
      
睇完出火就去佳樂水,去佳樂水前必定會經港口吊橋,不過我地都係睇左佳樂水先,入佳樂水要先付停車費,再經一段路才到停車場,這裡的停車場都幾大,有食野既舖頭,有買手信既舖頭,泊好車,影左一陣相,遇到一班強國旅行團,見佢地開始上左架觀光車,由於佢地太嘈,實在不想同佢地一班車,我地唯有再等下一班,要等多半個鐘,咁就唯有行下外面手信舖,結果係度掃左好多櫻花蝦,尤魚絲丫個D,仲買左隻竹炭花生,又幾好食wor。後悔冇買多幾包,買完野放埋d手信上車,就繼續等。
    
看見陸蟹出沒既路牌,早上不大機會看到,陸蟹好像是晚上才出沒,同埋現在不是繁殖季節,好彩看不見,每年好似都車死好多陸蟹,因為繁殖季節太多在馬路,車子不能避免要車過他們。
 呢個係台灣板圖,又幾似  呢個係觀音石 
呢個係蝸牛石  呢個係青蛙石  呢個係臥豬石,反左肚既豬冇左一隻腳 
右邊係蟾蜍石  呢個係山豬石  呢個係人面石 
最終我地坐個架車只得10個人左右,幾好,沿途司機會做埋導賞員,介紹特色既岩石…..老實說,有d都睇極都唔覺得似><……去到盡頭會停低架車,比15分鐘大家影下相,跟住就返轉頭lu。
   
睇完佳樂水就出返港口吊橋,呢度有停車場免費泊車,吊橋維護費nt10,純粹行下條橋,對面都沒有什麼行,拍拍照就走回頭了
    
一早打算係呢度食埋lunch,去左轉角食堂食野,呢間小小食堂很不錯,野食好平,即叫即做,又抵食又好食。
        
係度見到架好得意既車,係墾丁經常會見到呢D打扮得好靚既車 
食完Lunch就出發去鹿境親親梅花鹿,淡季既平日真好,只有我地同梅花鹿玩,比梅花鹿圍,入場費nt200,有nt100可於場內消費用,咁就用左一張nt100加nt20,買左2兜食物餵佢地,另一張nt100就買左postcard寄比屋企人。
        
佢地好肚餓咁喎,一路跟住我地拎野食^^…….佢地真係好可愛,個樣好cute丫……第一次咁近距離接觸梅花鹿
      
玩完鹿就去左恆春古城行下,當然要去下海角7號既阿嘉的家,不過其實我地冇睇過套戲,所以冇感覺,反而幾鐘意係海角對面個間店鋪,好有特色,2樓係餐廳有野食,睇完呢邊再行下東/南/西門(之後發現去漏左個北門^^),仲係恆春買左隻堅好食既蛋卷,我買個時冇試食,一心諗住隨便買d蛋卷做手信,返到香港先食,點知原來勁好味…..好後悔,好後悔冇買多d……….
        
呢間玉珍香蛋卷超好味,有多款味道揀,我個人覺得芝麻味最香,其次最鐘意咖啡,原味
 
行左一陣又食,又係隨便搵左間店食綠豆饌,天氣熱熱地食碗真係透心涼…..
   
其實恆春古城唔係好大,我地都係隨便搵個唔阻人既地方泊底架車,跟住周圍行下,行完再揸車兜去d城門影下相,有位就將車停埋一邊影相。
    
車子可以直接穿過西門到另一邊  南門在迴旋處中間 
呢度係"我愛墾丁"既門市,係呢度都有景點門票可以買
 
玩完就去下一景點,維多利亞騎馬,去到見到個小小馬場蝦子餅已經好興奮,除左狗之外,佢最鐘意就係馬,曾經想做過騎師,不過話自己高左少少,考唔到wor<<<佢話,唔知有冇吹水^^,佢去到見到人坐住隻馬係欄裡面走圈,以為我地買個隻30分鐘都係呢d…..><激死我,仲話不如每人騎15分鐘就算,可以退返一張飛,我話我地係去野外騎,唔係係個圈裡面騎架……佢先如夢初醒,如果30分鐘only係個圈裡面騎既話,我都唔會玩囉!!!跟住佢就由出發興奮到玩完,我地坐住隻馬橫跨4條線既馬路過對面,行入去樹林,又上山,又落山,行去人地住既鄉村地方,仲要係佢自己控制隻馬,我就有人拉住行前面,佢跟係我後面,拉住我隻馬個人不時回頭望下佢控制成點,一邊行一邊教佢點拉繩,點控制,結果蝦子餅好叻,好快上手,行到半路又停底比d馬食下草。30分鐘眨下眼就玩完…….蝦子餅勁開心,話下次來要再玩^^雖然nt850都唔平,不過佢鐘意冇計啦!
呢隻黑馬勁大隻,應該全場最大,買左包紅蘿蔔餵佢地
 
呢隻係迷你馬,唔會長大,通常小朋友是坐他
 
蝦子餅個隻大過我,不過我個隻係公,佢個隻係乸
  
行行下要食下草先  行完返來又飲下水 
玩完馬都接近黃昏,開始日落了,咁我地又回民宿休息下先,回程時經過了"好望角",之前都想過要住,後來看過comment話有點舊,同埋唔平,而且都係鐘意船帆石個景多d,所以最終冇揀。 
17:20分左右回到民宿取房,check in時付尾數,返到去仲可以慢慢係露台欣賞埋個日落,係呢度睇日落仲好過係關山睇,又唔洗錢又唔洗逼。
  
呢間房個間隔基本上同尋日個間一樣,只是方向唔同,很久之前打算來墾丁既時候已經睇中這間民宿,估唔到幾年後來既時候真係入住,更估唔到佢咁多年都保養得幾好,整體新淨過尋日個間,張床好大張,又幾好訓喎,個浴缸好大,真係唔錯唔錯,下次再來的話,都一定會再住。
         
抖完就出去搵食,今次泊係另一邊既停車場,近船帆石個邊,這邊車場平日nt40一小時,假日價錢就一樣,但就不設上限,如果知道泊得唔耐就泊呢邊便宜一點。
泊好車就行下大街,再去今晚個間餐廳"貴族世家牛扒",去到8點左右,唔洗等位,呢度係食扒餐為主,叫一個扒餐會跟埋任食自助吧,飲品任飲,整體真 係幾抵,因為自助吧都好豐富,有沙律吧,生果吧,甜品櫃,有烘面包,有熟食,有打邊爐,有烚野食,有自助沙冰,有酥皮湯飲,真係食自助吧已經可以食飽。我 地叫左個沙朗牛扒同厚切牛扒,沙朗好食d,冧d。
             
本來食完係大街買生果返去食,不過自助吧已經滿足左我地,最終乜都冇買。因為之前買左煙花仲未玩,我地就出發去龍磐公園玩,順便睇下星星,去龍磐個條路,完全冇街燈,真係驚驚地,沿路都行得比較慢,上面真係完全零光污 染,上到去係伸手不見五指,要開手機電筒照明,但一開電筒就會有好多不知明既昆蟲飛埋來,真係開又唔係,唔開又唔係。同埋今日有好多雲,見不到很多星星, 反而昨日係出火仲睇到更多。所以我地都快快手玩完仙女捧就走,快到插左係地下,一次過燒幾支,玩完記得要拎返d垃圾離開,台灣都是很乾淨既地方。
|
