係泰國旅遊既途中己開始不舒服,又痾又嘔,仲有頭暈,胸悶,氣喘,呼吸不暢順,心跳快(曾經去到120幾),有輕微發燒,食左退燒藥又好返d,係泰國既時候真係有d驚,因知道自己唔係普通食錯野腸胃炎個種痾嘔,最恐怖係心跳快,暈,胸悶,氣喘,呼吸不暢順等等徵狀,自己從未試過咁…..有一刻好驚自己返唔到香港,真係好似隨時會猝死咁,一訓底就好似有野壓住心口,呼吸困難,更需要試用蝦子餅既哮喘噴藥去放鬆氣管…….好驚自己一睡不起……雖然旅行後期已經沒有痾嘔,但身體間中還有輕微不舒服

31號早上回到港,回家訓覺,一直在家都沒有大問題,但晚上9點幾時突然又好唔舒服,不舒服的症狀全部回來,頭暈,心跳快,胸悶,氣喘,呼吸困難,所以蝦子餅立即同我去急症室,去到先量血壓,發現血壓好高,當時上/下壓有19幾/11幾,有點暈,醫生立即安排我訓床,先做心電圖,再給我降血壓藥,期間其實都好不舒服,再去做xray,照個胸,做完就要等2個鐘,觀察血壓,過左1個鐘血壓仍然好高,有18幾/10幾……又話要再等,期間比左粒止暈藥我食……再做心電圖,跟住再等2個鐘後血壓仍然高,要安排住院,9點幾入急症,搞到3點幾先話入院……><

上到病房等左一陣見左個好後生既醫生,重覆講述唔舒服既地方…..其實我一直都同醫生講我之前嘔既時候咳得好勁,會唔會chok親氣管所以氣促,但冇理會我……同我傾左幾句,叫我休息,明天有檢查做。

1-Jun-16
到第2日,又有個好後生既醫生來抽我血,因我入院當天已抽了2次,問佢點解又抽,佢話因為要驗甲狀線,所以要抽大動脈既血,佢話會比較痛,叫我忍一忍,佢未抽血之前,係度擺好我隻手個位已經搞左好耐,都心知不妙,跟住到抽血既時候,總共拮左我6野,係勁痛,直頭痛到我標哂汗及想暈……跟住抽完之後仲要話唔得,要再抽過,當下真係想暈係度,我話抖抖先得唔得,佢話會抽第2個位,我話咁左手啦,佢話我手唔夠血,話介唔介意要抽大脾,乜我可以介意咩…..跟住又係我大脾按左好耐,都搵唔到血管,最終話要抽返左手,我真係堅驚,之前右手痛到暈,係佢再抽我既時候,我不斷大大力深呼吸,好彩最終只拮左4下,而且冇咁痛,絕對肯定佢第一次手勢唔好……抽完既左手搞到瘀左成個星期,好彩佢冇嘗試幫我抽大脾,唔係一陣扯完又話唔得…….

隔左一陣又另一個醫生來睇我,係副顧問醫生,又係好後生,我又講述一次我唔舒服既地方,醫生就話我心跳係快左少少,跟住要我留小便驗下係咪血壓高,要每24小時留一桶,total留3桶,跟住就等報告,期間再照多次xray,照個肺,跟住就休息同等報告,當晚準備訓覺之際,心胸突然又好有壓逼感,呼吸困難,立即成個人坐起身,叫自己盡量放鬆,但都有點暈,便按制叫護士,護士幫我量血壓,又15幾/10幾,跟住聯絡醫生,醫生話建議我快d訓覺,抖下….><,大佬,我夠想訓啦,但我突然唔舒服麻,咁點訓呀,護士話醫生晏d來睇我,又比左粒止暈藥我食…..(原來粒藥會有睡意),諗住等埋醫生來見完我先訓,點知等等下都訓著左,當時係夜晚12點後,係呢d時間唔舒服,真係好驚,聽得多鬼故,醫院最常都係夜晚晚會有人走……..

2-JUN-16
到第2朝醫生再來見我,我又講述返尋晚突然唔舒服既狀況,佢聽完跟住係度思考……跟住話同我驗過既野暫時顯示我沒大問題,心臟沒問題,心電圖,驗血都沒問題,咁我話其實係咪因為我嘔得勁,搞到氣管扯,引致血壓高,佢就話,咁好多野都可以引致血壓高,咁我夠知啦,上網都睇到啦,洗鬼你講,咁我而家身體上係真係有唔舒服丫麻…..要搵出原因丫麻,真係激死我,跟住話幫我安排多幾個檢查,但就排期幫我做,仲話如果我想詳細檢查心臟,建議我出去搵私家做,話好多人都係咁,如果係政府排,可能排到2018,跟住安排我出院先…..><……其實係度佢真係唔會再安排我做D乜,就算要做都要排期,見我又未去到好緊急,唔會立即幫我再做更深入檢查……雖然出院,但就要拎2桶野返去繼續留多2日小便,留完拎返醫院

係呢個時間我就通知自己保險咁既情況,立即幫我安排左個心臟科醫生,同我入院做檢查。