今日終於打風啦,真係好久違,算係咁啦,入左稟考車,又食左大餐,今日都真係算唔錯。
夜深啦,每晚GE呢個時候,我都總係會等佢GE微信,雖然好耐好耐之前佢講左話「唔得」「No」「Sorry」,但係我依然唔死心,係死唔到心,雖然有一排我唔知將自己擺係咩位置,見到面都係得尷尬,而且又同時又仲未死心,後來仲傻到@佢個陣,打左句「希望你可以每晚都@下我」,佢真係有做,佢晚晚都有@我,我好感動,點解可以咁好。
後來就咁樣過左一個星期到,微信個陣有時都會不經意加個「bro」上去,或者咁樣可以真係可以消除尷尬啦,或者係大家都自欺欺人,ha,我又係到胡思亂想...個個星期我晚晚都係到諗,「如果可以咁樣落去,真係幾好」「咁樣落去,我又可以點」「我好自私」,後來同番個「心靈友」傾番,佢講:「佢又真係幾好人架wor」
我聽完之後,即刻就心酸,我心諗「係lor,佢本來就係咁好,仲未夠咩?夠啦。」我攞起部手機,對左好耐,可能只係一陣,不過唔緊要,到左最後我係微信同佢講,「多謝你呢幾晚都@我,夠架啦,你男朋友好夠運氣」到依家我都未攪清楚究竟我係同緊佢講,定係同緊我自己講,我真係唔知,係呢到我都要多謝陳小春先生GE一首不歡而散。
原來好多野都可以釀成酒,就連一D莫可名狀情感都可以,又到左例行練舞班GE日子,終於又見到佢啦,今日導師Andy教番一D基本功之後就開始講番隻齊舞,我點都諗唔到佢接下黎講GE野,「5男4女,嗯...咁好啦,依家你地每個男仔搵一個女partner」
呢個時候,我心諗「賴野啦...」但係我心裡面最深層個度係期待緊,我地馬上就用「荷媽」GE方式進行配對,其中澤西同九爺已經揀好自己 GE partner,神手就跟Andy,我心諗得番:「我,豪,佢,Carman,兩男兩女唔好咁巧啊」
好波,真係驚個樣就黎個樣,好,頂硬上,硬就硬啊,成身都硬晒囉,尷尬又緊張,個part舞基本上都係有D身體接觸,我睇得出佢都有D唔自然,都好尷尬,練左兩三次之後,佢就電話響左,呼,我諗我地兩個心入面都會話:「黎得及時。」
就咁,佢就傾左好耐,直到排完,雖然我明白自己一個練習係有D怪,心裡面更係不斷亂諗,好想走,但係我同自己講,「你係男仔,大方D,得GE」所以我繼續扮冇野。
個一晚,真係發生左好多事。
|
