我都好耐冇打過BLOG了

大大話話都半年有多 , 之前諗住整個年度回顧

都係冇乜心機打 , 有機會就補番2018年回顧啦

今年既生日真係滿滿既驚喜

其實我就唔會奢望生日果陣會收到D咩禮物 , 其實簡簡單單有心講句生日快樂我都已經心滿意足

今年就一次過收到2份勁有心思既禮物 

一份就係19號夜晚由我個好姊妹送既釘畫 , 一口釘一條線咁編織而成既風車畫

真心好有心機 , 我見到既時候都O左咀 , 究竟要用幾耐先整到出黎....

由細到大都未試過有人會為左我而咁有心機咁 , 用左幾個月既時間去整一份禮物比我

所以都有D感動同埋覺得驚喜

之後又同佢傾左陣計 , 其實之前點樣都好點差都好 , 都係一種經歷 , 都係成長之中既一堂課

無論將來點都好 , 都希望能夠互相扶持

而另外一份就係由我既女朋友送既卡比獸爆炸盒 , 雖然我一早就知道佢會整爆炸盒比我

但係到今日由見到佢再到拆出黎睇果陣 , 一直都充滿住驚喜

個傻仔竟然昆我話上緊堂 , 到我疊埋心水諗住打LOL既時候

就收到佢個電話  ......原來佢靜靜雞咁上左黎

到我行出去門口果陣都唔敢相信佢喺我面前出現 , 呢下真心係由細到大都未試過比到我有咁既驚喜

仲整埋蛋糕比我食 , 同埋個卡比盒....

卡比盒真係冇諗到會整得咁有鋪排 , 而且亦到令到我有D感動

真係辛苦哂寶寶了 , 用左咁多時間黎整

夜晚再去食牛涮鍋 , 2個都飽到想嘔

呢2日我過得好開心 , 亦都深深咁體會到什麼是驚喜...

好多謝寶寶同埋姊妹製造左唔同既驚喜比我

我好開心 , 好多謝你地 , 令我過左一個難忘既生日