TO:給為情所困的人

你知唔知,其實我依家真係好嬲你?其實頭先你話要將你D朋友仔交比我,你唔理,我已經好唔開心,因為人係你交比我既,但係之後你就咩都唔理,真係好不負責任呀!

諗住睇下你個BLOG,睇你呢排點樣,點知比我見到D仲火滾既野..你竟然想唔要命?為左一個唔愛你既人,就做埋D咁傻既事??如果冇人發現,就咁冇左條命,係咪真係值呀??

你當條命真係你自己??你死左真係咩負任都冇?我開頭覺得你心情唔好就掉低你既朋友,已經好不負責任,但係我估唔到你係咁自私,想連屋企人同朋友都掉低!!

你條命連繫住好多人既生命同責任架,你想就咁一走了之?你咁樣會唔會自私左D呀?你仲欠緊你父母既債架,養你既債,付出心力既債,你唔用一世既時間,點還得哂?

你想就咁掉低你D朋友仔比我?唔洗旨意呀!我唔會負責埋你果份,唔該你自己做番自己既本份呀!

我可能係局外人,感情可能唔到我講,但係我都有經歷過,比起你更加難受,更加難堪既都試過,比最信任既人呃,比人傷害,係好難受,成個世界都好似冇左咁

但係依家睇番轉頭,根本只係經歷既其中一部分,唔係經歷過呢樣野,點會成長?唔係咁,我又點知屋企人同朋友仲緊要過男朋友?唔經歷過,我又點會變得咁硬淨?

如果你係三唔識七既人,我只會一笑置之,但係因為你係我既朋友,我先會心痛,先會嬲,要打頭先既留言比你,同埋打呢篇BLOG,知唔知我又諗起番幾多唔開心既事??

其實打呢D野,我個心真係乸住乸住,但係我係度打呢篇BLOG,唔係想話你D咩,只係都希望其他人唔好咁傻,唔好做D會令自己同人地後悔同難受既事,與其要死,不如拎你想死既勇氣出黎面對自己!

講咩都冇用呀,你要自己諗得通先得!

PS:我唔知你會唔會睇到呢篇BLOG,亦都唔知你會唔會睇完之後嬲左我,但係呢D都係我好想講既野,希望你知道,作為一個朋友,我唔想淨係講D岩你聽既說話,我都想你好,但係如果你會唔中意都冇辦法

但係如果你係一個成熟既人,你會明白我想表達D咩,希望你唔好再做D傻野啦!