今日約左中斯北上按摩, 一起身食完早餐之後就出發....

中午上到去, 去左飲茶, 食左八樣點心, 埋單6x, 低食。

行左陣就去左按摩, 今次係個肥妹幫我按, 佢一入黎就大呻由朝早8點一直做到而家(4點幾),  又未食野, 好累, 點點點...

跟住佢就開始按, 問我夠唔夠力, 我表示唔洗o甘大力....但佢按按下越黎越大力, 我再表示唔好o甘大力....佢再越按越大力....按完身後, 佢仲要講一句: 你成日按摩架?!o甘受力既....頂!!!我叫左你唔好o甘大力架, 又話未食飯好累都o甘大力, 食飽左仲得既!!!

按完後去食飯, 明明我一路覺得無咩胃口, 但都叫左5個送, 食完仲係覺得好似無食o甘, 再試埋個香蕉薄餅, 好好味... 

食完飯見時間倘早, 諗住係羅湖搭火車返黎, 點知可能係暑假既關係, 我終於見識到傳說中既打蛇并....差d焗暈左...