本來今日好多野要做, 但無咩心機, 無無聊聊同多熊MSN, 忽然大家就話不如今晚出去食飯.....errr....我原本準備今晚ot做好晒d野架bor.....

lunch時開始滿腦子食咩好呢食咩好呢....唔理啦, 聽日先算, 今晚一於出去食食食.....哈哈哈

最後決定食露比星期二, 好耐無去過啦, 十幾年前, 好鍾意同瑪迪迪去海運o個間, 一定要坐窗口位, 一人一個古古力(我既)同一個士多啤梨(瑪迪迪既)tall cake, 一路望住出面既海(好鬼多垃圾), 一路懶高貴o甘食.....哈哈哈哈~

6點半3個準時到達德福, 就一支箭o甘沖去露比, 由於大家都諗住留肚再戰聰嫂, 所以只係叫左芝士薯條, 香脆雞肉漢堡, 白汁海鮮意粉同埋古古力tall cake, 野食一般, 個tall cake一樣係o甘好味

食完好似無食過野, 本來大家仲想拮下魚蛋燒賣煎讓3寶, 但最後又懶得行黎行去, 於是就直入將軍澳....

入到將軍澳, 多多要去狗狗醫院買狗糧, 去到見到個磅, 我地又走去磅下啦, 唔磅好地地, 一磅....哇哈哈哈....大家都大受打擊, 不過算啦, 我要肥先至好睇架ma(自我安慰中)

買完狗糧就去聰嫂, 次次都係食榴槤野, 今次我想試下新野, 於是就叫左個薑汁柚子果凍, 但我覺得個薑汁奶太甜.....下次都係食返榴槤!!

唔知係咪食得太多甜野, 食完大家又好想食返d咸野, 於是又去seven啦, 最後唔知食咩好, 熊熊話覺得你老闆紙菜無以前o甘好食, 於是大家就買包即場驗證一下, 最後一致栽定真係無o甘好食。