中國男足職業定業餘？ 一 鳴

中國男足職業定業餘？     中國男子足球隊是職業定係業餘？了解中國體育的讀者一定以為筆者寫錯咗，可惜的是一鳴真係冇寫錯，呢樣嘢對中國男足一直都係一個問題。其實呢個問題是日前新一屆中國男足在阿曼練波時，一位阿曼足協的職員問在場邊的中國記者嘅：“你哋呢支係職業隊嗎？”     阿曼足協呢位職員應該唔係有心攞景，事關阿曼國內聯賽好似澳門一樣就係業餘聯賽，他對中國隊的疑問再正常不過。新一屆中國男足的表現卻完全稱得上是業餘嘅。面對無海外球員歸隊、基本上是業餘球員組成的阿曼隊，中國隊居然以一比三輸畀對手，唯有佩服嗰位阿曼足協職員的目光如炬！     對於中國隊輸波教頭同球員都有共同解釋，就是由於球隊新組建，球員之間缺乏溝通同了解，如此解釋根本不值一駁。無錯中國隊係新組建的，但球員基本上都係啱啱打完中超聯賽的職業球員，就算臨時集中成隊亦無可能無晒職業球員的水準，輸比一支業餘球隊都有得解釋，難怪中國男足永遠都有理由輸各種重要或者係唔重要的比賽——而且不管對手係邊個，都一樣有敢於輸波的勇氣！     睇下歐洲唔止一支國家隊多數情況下都是由各球會的球員臨時組隊參加國際賽，依然經常會踢出好高的水準，如果按中國隊教練同球員的邏輯，人哋基本上都唔使打比賽啦。     返回以上的嗰個問題，中國男足究竟是職業定係業餘？答案兩睇：講踢波有時職業有時業餘而且業餘時間唔算少；講酺吧講飲酒則絕對係職業水準。一言以蔽之：中國男足係一支業餘嘅職業隊。     一  鳴   reference: http://www.macaodaily.com/html/2008-12/23/content_263018.htm