第2日。今日好忙，因為去咗好幾個地方。
一日嘅開始在早餐，我就喺酒店嘅「小餐廳」食。因為琴晚5點幾(香港時間4點幾)食晚餐，所以今朝好肚餓，食咗幾個飯團同一碗味噌湯。好飽！
因為時間仲早，所以食完嘢就返房。就好似Angel講，喺外國聽唔到商台，唯有聽港台。我諗下個禮拜去美國都係咁。
實在諗唔到有邊度非常來想去，所以就近近地喺東京市內玩啦。
第一站係去江物戶東京博物館，睇最後一日嘅兵馬俑展覽。笑爆咀 - 中國嘢要去外地睇。不過因為佢哋，我第一次因為自己係中國人而感到驕傲 - 二千幾年前就整個咁巨型嘅墓穴喎？！如果啲人話埃及人係外星人，秦始皇同佢啲靚都有可能係。
之後去咗台場。無乜特別，購物中心一大堆。去吓呢個麼、去吓果個麼，咁就4、5點，天黑囉。影吓夜境咪搭車返酒店囉。不過返酒店之前喺歌舞伎町博多天神食咗碗麵，再買啲口立濕，就返酒店喇。唔好話我咁早返酒店，當你試過同我去旅行，8個鐘入面行咗7個鐘就知會點攰法。
|
