我搬喇~  呢個係我嘅新網誌地址。各位，珍重喇~ (如果你哋仲可以入嚟睇到呢個message~)

http://cbkawai.blogspot.com/ 

一整個long weekend，我竟然每日都上唔到個blog。儘管知道可能有其他competitors對呢個網站作出攻擊，但作為一個user，我係咪應該放棄呢個唔stable嘅網站？好frustrated！

古代有宰相、承相、師爺... 等等為皇帝分憂解困嘅「官」。我最近發覺自己嘅身份，就好似呢啲官，專門替佢「老闆」提供意見；而呢啲意見會對「公司」又或者係某啲「同事」有影響。我係乜身份做呢啲嘢？HR & Admin主管？老闆大秘書？定只係以一個朋友身份俾啲意見老闆呢？

唔知古代呢啲官喺向「老闆」提供意見之餘，睇見其他人加官進爵，而自己又任何利益，會唔會好似我咁，有酸溜溜嘅感覺？

又係一個好忙嘅weekend。

事緣上星期同老大食buffet嗰陣話要整個生日蛋糕俾佢，OK，就星期六整啦！而喺星期五晚同AnnAnn同Mamee打邊爐嗰陣，AnnAnn話對我整嘅蛋糕有興趣，就係咁，我應承為佢準備一個檸檬芝士餅做birthday cake。因為兩個承諾，我就有一個充實嘅weekend。

星期六下晝，首先開始檸檬芝士餅嘅餅底。夜間再做檸檬芝士部份。出嚟嘅效果出奇咁好，味道極之清新。做完再開始另一個assignment - 栗子蛋糕。呢個係一個大失敗，因為海棉蛋糕唔鬆，栗子蓉又好似太甜(不過呢部份唔關我事，我只係將冇甜味嘅cream同栗子蓉打埋一齊)。好失望，冇心聲埋尾。

星期日下晝，開始再為第二個栗子蛋糕努力。效果仍然唔係好好，非常失望。唉~ 唯有下次再試過，不過今日就過得好忙、好充實。不過好在AnnAnn覺得檸檬芝士餅嘅味道還可以，咁都冇咁down~

有搭巴士睇RoadShow嘅人，最近一定俾兩個廣告煩到想跳車 - 香港寬頻「豈有此理」，同Dr Tann「奪A升Grade」。佢哋出現嘅頻率，可以高達隔個廣告 / 環節。以一個30分鐘嘅車程，可以見到個廣告高達15次 - 你話死未。

好懷念以前可以安安靜靜咁搭巴士嘅日子...

自從我加入呢間公司，我不單只係HR、Admin、Finance同IT嘅主管，更係老闆嘅慰安婦，近日仲做埋參謀。

公司依家好似有一個不成文嘅習慣，只要你辭工，就有人工加。最近又有個咁嘅case，「皇上」 又搵阿参謀我共商對策。A小姐話最近有個政府工嘅offer，所以想辭工。佢老闆同我老闆即刻驚到鎮，話要加人工留A小姐。身為HR頭，當然要諗計；作為老闆妹仔，亦要為佢分憂。要喺一問一答嘅電光火石之間，俾出一個大方得體又合情合理嘅答案，我都覺得自己好叻。

最sad嘅係，今日我會為想走或者只係想跳草裙舞，俾意見老闆，應該點樣客觀處理。但他日我想辭嗰陣，就冇呢支歌仔唱。而且從佢口中，佢覺得我嘅人工好OK。佢仲話如果我走，佢都會留 - 因為我有利用價值嘛~

灰，好灰，真係好灰 ... 今日一傾，就好似為我喺呢間公司嘅前途敲響咗喪鐘...

相比普通人嘅奧運會，我更期待即將舉行嘅傷殘奧運會。當世人注意身體正常嘅運動員所接受嘅訓練點樣點樣艱辛，有冇人諗過身體有缺憾嘅人喺訓練時，呢啲艱辛對佢哋又會更艱辛？

我唔期待香港運動員喺傷殘奧運會攞幾多獎牌，因為喺我心目中，佢哋每一個運動員已經係金牌得主。

今日休假，帶兩老去醫院覆診。朝早仲有啲時間，就送彤彤返學。一路上見到好多媽媽帶小朋友返學，佢哋俾我嘅感覺好溫馨。 

媽媽嘅手唔係緊握小朋友嘅小手，就係雙手緊抱小朋友；儘管媽媽嘅衣著可能唔係好靚好光鮮，但小朋友用嘅嘢就一定係最時興嘅。媽媽就算成身濕晒，都唔會俾小朋友淋到半滴雨；個個小朋友嘅面上都有可愛嘅笑容，反影喺媽媽面上，就係「幸福」兩個字。

回想當日我返幼稚園，4歲嘅我由9歲嘅大哥帶穿我返學，入到課室都唔放手俾佢走，每日都要由上堂喊到放學，攪到大哥唔放心返屋企；直到高班轉去另一間幼稚園，由姑媽帶返學，情況有些少改善，不過仍然每日一喊，姑媽亦陪我一齊上堂。我嘅裙仔唔係名牌，但都係購自百貨公司。姨媽姑姐、契爺契媽、表姐表哥，無一個唔錫我鍚到出面入骨。原來我喺屋企人嘅心中，亦曾經係一樣...

如珠．如寶。

琴晚上堂收到新聞短訊，話日本首相福田康夫辭職。今朝聽新聞話，原來係因為在野黨嘅反對勢力。我對日本(人)好失望。

有困難乜唔係要面對咩？佢依家係lead一個國家，而唔係一間公司或者一group仔人。有不同意見，頂唔順就quit俾第二個做，問題依然存在。點解唔試吓同在野黨以國家利益為前提，好好坐底傾吓國家嘅方向應該係點？畢竟國家經濟已經差咗好耐，再攪落去只會更雪上加霜。(唔通真係要靠輸出3 / 4仔振興日本經濟？)

原來福田已經係呢個黨第二個「著草」總裁，睇嚟日本人喺下一次大選要睇清楚先好選。

每個星期日都係我嘅Cooking Day – 因為印印放假，我要做中國女傭煮飯俾兩老食。今日有啲特別，因為我完全為自己煮嘢。

早餐 – 香脆蒜蓉飽。我嘅造法：先將焗爐以180度預熱。硬豬仔飽切成四片，塗上植物牛油。(題外話：我三哥再一次提醒我：應該係「植物油」，因為「植物」係唔會有「牛油」嘅！)將兩至三瓣蒜頭切成蒜蓉，塗喺牛油上面，再灑上些少鹽。放入焗爐焗約15 – 20分鐘。

小食 – 牛油曲奇餅。我嘅造法係跟網上某啲人嘅recipe，但唔係好work，可能因為牛油分量太多，所以麵團唔「企」。由於係我嘅第一次，成績仲可以接受。下次再努力啦~

晚飯 – 玫瑰露豉油雞(肶)。我依照黃淑儀嘅recipe再改些少：佢落3湯匙糖我就只係2茶匙，因為我唔鍾意太甜；佢落8湯匙蒸魚豉油，我就因為屋企冇蒸魚豉油，而改為4湯匙豉油雞汁，同樣原因，我唔鍾意太甜。成績亦非常OK，起碼我個百彈齋齋主老豆就冇「彈」。仲有炒椰菜。我用雞粉吊味，將啲菜煮多些少時間，我覺得好食之餘，又竟然獲得好評，大意外~

小食 – 朱古力布朗尼。從我嘅實驗証明，用一般朱古力整嘢食唔係好work，因為佢哋嘅melting point好高好難溶。呢次我唯一改嘅嘢係個容器 – 因為我冇recipe中嘅迷你muffin盤。

一個星期日就咁就過咗。我好似好忙，但我覺得好充實，而且煮嘢食對我嚟講，有鎮靜作用，所以我今日非常calm。