又講到外國嘅女仔非常豐滿，喺香港人眼中根本就係負分嘅等級。但呢度嘅女仔絕對唔會因為自己嘅身體而引以為恥，相反佢哋會盡打扮自己，可能係為咗取悅他人，亦有可能只單純為取悅自己，一啲都唔覺得肥有乜問題，而事實上只要係健康，的確又真係冇問題喎。

我覺得呢種心態非常正面、健康。畢竟，一個美麗嘅外表同身形係，啲確令人賞心悅目，但始終，美麗嘅外表不能永久。如果因為自己唔合乎世人嘅標準而令自己唔開心，又或者係做事同食嘢都閂住閂住，咁又為乜喎？不如做個健康嘅開心快活人仲好啦~

原來香港人真係好膚淺。

去到外地，乜嘢都特別大份，包括人在內。所以我見到外國人對愛情同香港人有乜嘢唔同。

參加local tour嗰日，團中有一對情侶Carrie同Jim。Carrie係一個非常豐滿嘅女仔，但好健談、開朗，Jim對佢真係愛護有加。而係悉尼街頭，一對對男女亦不乏港人眼中嘅扒仔扒女。如果根據香港人嘅標準，嗰啲澳洲肥仔肥女一定會孤獨終老。但眼見街上男女成雙成對，佢哋話我知，原來愛情係唔會計較外貌身形，鐘意就係鐘意，愛係大晒嘛~

香港人真係好膚淺。

另一個好悠閒嘅日子。一早起身食早餐，之後去唐人街行街市。呢度係我哋shopping嘅地方，因為有個local 嘅wet market。個半澳幣一個皺皮瓜、1蚊一個生菜，再加上超市買嘅河粉同雲吞，就變成咗我哋今晚嘅晚餐。再加埋前日食剩嘅雪榚做甜品，簡直就係perfect。

中午同Mandy喺唐人街東海飲茶，同香港嘅味道同價錢都差不多。重點係可以同住喺外國嘅朋友見面，真係好開心。之後繼續行程去「打令」港，我真係唔覺得有幾特別，咪又係行行企企影吓相。嗰度唯一可取之處係非常近唐人街，亦因此非常近酒店。

今日平咗琴日嘅紀錄，6點咁上下返到酒店。我都唔想嘅，不過又冇地方行，早啲返酒店煮嘢食、睇電視休息仲好啦！我諗呢啲就係我鍾意嘅旅行方式 – 係真正嘅放假同休息，唔駛四圍趕嚟趕去。 

好舒服、好得閒、好hea嘅一日。Circular Quay站可以一次過晒Sydney Harbour Bridge同Sydney Opera House。

去Sydney Harbour Bridge嘅感覺就好似喺倫敦嘅Tower Bridge一樣，都係從橋上望向對岸嘅風景，唔同嘅係喺Sydney，你可以俾錢行上條橋度。唔知係咪「思鄉」，我都係覺得香港嘅風景靚啲。

Sydney Opera House，無論佢嘅建築工程有幾浩大，我始終感覺唔到嗰種震撼；靚咩，so-so 啦！但係可以喺非表演時間進入表演場地，感覺又幾得意。

原來澳洲係一個勁貴嘅地方。先唔講佢近來匯水幾貴，就佢連喺Information Centre都賣嘢，而且啲嘢勁貴就知。還好酒店有微波爐，可以買急凍食物返嚟「叮」，如果唔係淨係食都唔少嘢。 

我唔知其他國家係咪咁，但澳洲啲電視節目超悶。係，係有好多真人show，但完全係抄外國節目：Australia Got Talent、Australia’s Next Top Model、Big Brothers… 做嗰個唔怕觀眾悶嘅咩？仲有，如果唔係本地製作，就係播美國片集，澳洲啲電視製作人做乜嘅呢？

今日勁行路 – 呢種又正正係我鍾意嘅旅行方式。由Circular Quay行上去Harbour Bridge Tower，平路共大約半粒鐘、樓梯幾百級，都咪話少嘢。之後又行返落Circular Quay再過去Opera House，又差不多15分鐘，再喺嗰度行吓參觀吓共個幾兩個鐘先行返去Circular Quay食晏，嗰陣時個肚餓到不足為外人道。今日嘅午餐係一件pizza - 不過按澳洲嘅標準，一件pizza係等於四分一個pizza ...

食完晏又行過。由Circular Quay搭一個站嘅「火車」去St Mary’s Cathedral，行到天黑先行返酒店，大約又行咗個零鐘頭 – 勁呱？！晚餐係食咗3個1吋x2吋嘅小肉批 – 因為仲好飽。食完就等睇House Season 2 / 3 (唔係好記得)。

好好彩可以跟一個非常local嘅tour去Blue Mountains。呢個團連司機/導遊Mark只有5個人，而去嘅地方非常合我嘅口味，睇到好靚嘅風景。可能係一個excursion，完全無hard sell嘅shopping行程，而且仲喺一間超過一百年歷史嘅酒店食晏，感覺好得意。雖然要成百蚊澳幣，但非常值。 

今日去Blue Mountains個行程好豐富，有動有靜。動嘅唔係我，而係動物園嘅動物：樹熊、袋鼠、企鵝超可愛，仲有一啲我好驚嘅爬蟲類動物；靜嘅有好靚嘅大自然境色。Mother nature真係好神奇，佢有佢一套做嘢嘅方法。雖然山火對林木造成好大嘅損害，但喺另一方面，俾一個機會佢哋rejuvenate / regenerate，樹木嘅灰會成為土地嘅肥料，而一場山火亦可以幫某啲植物散播種子。大自然一早已經有佢嘅「發展藍圖」，真係奇妙。

好羡慕人哋外國有咁大個國家公園，而公園內有齊風化、侵蝕等自然現像嘅例子，又可以放假時行吓山、睇吓風景，一樂也。

好得意，落機時明明好天好地，轉個頭就已經「天昏地暗」。唔怪得Mandy話呢度一日有齊四季。而且天一黑，氣溫開始下降，又起風，好凍。最好玩嘅係準5點開始以高速日落，唔駛半個鐘個天就黑齊。最最最過癮嘅係6點鐘開始乜都收工，剩返一兩間舗仔吊命，所以好慘，無啖好食。

酒店，一間apartment咁，有微波爐、雪櫃、洗衣機... 所以未至於餓死。而且仲有個客廳，瞓唔著可以出嚟睇電視都唔怕嘈到人。不過可惜嘅係無乜節目好睇。

好期待去藍山...

今次嘅目的地係悉尼。9個鐘頭機，話長唔長，話短亦唔短。機上睇咗兩套戲，其中一套係細路仔歷險片，無大驚喜。另一套係Penelope。我好唔鍾意套片，因為呢套戲嘅主題係「自私」。

阿媽因為個女生成似豬，就唔俾佢出街，令佢嘅生活變得不見天日；阿女為咗解除自己身上嘅咒語，嫁邊個都得。套戲唯一可取嘅地方係老實，開宗明義只要外在美，傳說中嘅內在美唔該死埋一邊。

就係因為套戲令我無代入感 - 因為我只有所謂嘅內在美，我唔鍾意~