近來公司又請人，而且係一次過兩個post。其中一個我唔擔心，因為依家係畢業生搵工季節，一定有supply。我只係擔心另一個post - 係呀，又係倉呀，要中五程度操流利英語嗰個呀。今之都算好彩，有幾個盲毛應徵。就因為咁，開始佢哋一個難忘嘅經歷。 

一般人見工，會俾僱主問到口啞啞，見完工會喉痛聲沙。但嚟我公司見工，見完你要用耳舒潔，因為由開始interview嗰一刻開始，你就要受噪音攻擊，而且係好大聲嗰隻。In你嗰個人會不停講不停講... 你只需要同可以做一兩個簡單嘅反應。十足十俾人「盤」。而順利獲公司聘請嗰個，就開始佢喺我哋公司悲慘嘅遭遇 ...

我情不自禁咁問：究竟「嗰條友」想知我哋份工啱唔啱個應徵者，定係個應徵者希望我哋會請佢呢？

今日我公司個Sales Department啲女好勁，又擺空城計。

阿Coordiniator好型咁用SMS整個短訊返嚟：Not feeling well take sick leave today。

阿Officer就好啲，有返些少禮貌： I think I get cold.  Would like to take a leave for having some more rest。

而另一個同事一早就請咗day off，所以OK啦~

睇完兩個「請假」SMS，我終於知道點解有啲人可以做Officer而有啲人只可以做Coordinator...

近日好似成日聽到人話自己係鬼妹/鬼仔性格。其實乜嘢係鬼妹/鬼仔性格？係咪「I don't care」就係呢？

其實我覺得話自己有鬼妹/鬼仔性格嘅人萬二分唔負責任。乜鬼妹/鬼仔就唔會有深思熟慮、為人設想、心地善良嘅人啦咩？

所以讀國際學校嘅藝人們，你哋只係(曾經係)國際學校嘅學生，唔係外國人，唔可以誤以為套上外國人嘅性格，就可以為自己放浪形骸嘅意識形態同言行舉止作解說。都不知幾多真鬼仔鬼妹比佢哋呢啲假洋鬼子有道德觀念呀 ...

香港一直受上天寵愛，此言非虛。

由前晚開始個天已經想落雨，琴日朝更真正落出雨。心諗：大佬，傳緊聖火呀，唔好落啦~ 哈~真係開始停雨，而且一直到傳遞聖火完畢都仲係好天，仲有太陽添。你話個天係咪「錫」香港吖~

仲有香港人真係好理智。儘管平日點批評政府，有起事上嚟，大家永遠一致對外。今次香港市民都好支持呢項盛事，而且一切都好和平咁進行。起碼俾外國人見到，中國人(至少係香港人)非常團結、齊心~ 

為咗500蚊酒店餐飲現金劵，我去咗做「focus group」，而且係好豪嗰啲。

呢個係一對一嘅presentation，介紹一個話會升值嘅酒店渡假會會籍。聽起嚟非常吸引 - 一世去旅行住酒店唔駛錢喎，就算要都係非常平 - 講緊係1,000蚊港紙住一個禮拜5星級酒店喎 ...

唔好開心住~ 個membership要港幣391,000蚊，一年可以用嘅時間大概係兩個禮拜到一個月，而且每年要交大約1萬蚊maintenance fee，就係為咗你今世去旅行住酒店都唔駛俾錢。

我有39萬都用嚟俾首期買樓啦~ 買個「名份」喎，當我傻嘅咩...

首先，百老匯非常衰格。第一次我approach佢哋，關於我部玩具時，佢哋話「冇現貨睇，要就俾錢買」。OK，過兩日等你有貨再嚟過。兩日後我再去問，今次有貨睇，我睇完都要考慮買唔買呱，返公司苦思兩個鐘，決定「買！」就再落去訂 - 因為先頭個哥哥仔話要訂先有。OK，又去一次，今次仲絕：依家斷晒市，船期又唔知幾時到，冇得訂呀~ Fine~ 我去第二間試。

就喺我嘅第一站，而且仲係無意中行過嘅銅鑼灣國美(近時代廣場)時，竟然俾我見到 - 1，2，3，買！就係咁，成事喇~

我依家好滿足，仲有決定唔再幫襯百老匯~

今日你著乜嘢顏色嘅衫呢？有人支持北京奧運同喺香港傳遞聖火呢件盛事而著紅色，亦有人為悼念琴日車禍死亡著黑色，更有人支持藏獨著橙色...

不論你著乜顏色，重要嘅係你自己個人點諗，而唔係人云亦云。電台節目講得啱，香港人活得非常理所當智。我哋可以喺支持聖火傳遞之餘，亦為車禍死者哀悼；又或者為車禍死者哀悼之餘，亦同時支持聖火傳遞... 只要你有point。

不過其實乜色又有乜關係？至緊要你今日有著衫出街 ...

(1) 電影「兩小無猜」內嘅一首歌曲。

(2) 今日係我老闆生日。

(3) 今日喺西貢發生交通意外，17人死亡。願亡者早日安息，佢哋嘅家人節哀順變。 

有說話因為「 蟑螂」嘅打不死同勁強嘅生命力，所以將來統治地球嘅會係「蟑螂」。

我生命力唔算強，但我都算係打不死。就例如面對我老豆日常嘅單單打打，同佢百彈齋齋主嘅習慣，我都仲可以徹底發揮我嘅「時運高，聽/睇唔到」。自我有記憶以來，我做嘅所有事，未有一件啱佢心意，又或者佢會讚一吓 - 就係一吓咁多都冇。就連最經典例子我喺醫院簽名同意佢做通波仔手術都係錯，而且大錯特錯。整嘢比佢食就更係法國大餐 - 「多舊魚」。

原來錯到最錯，係我生成做佢個女。

成日見到喺朝早返學嘅時間，有媽咪或者外籍傭工幫啲細路揹書包去車站。我已經好不齒呢啲細路 - 又唔係冇手冇腳，做乜要人幫佢哋揹？今日我見到一個駝晒背嘅阿婆，幫一個肥獅大隻嘅死仔飽揹書包，我望住佢佢仲眼超超，我見到真係火都嚟埋。

我知可能係阿婆錫個細路，唔想佢咁辛苦揹一個又大又重嘅書包，但咁樣真係愛佢變成害佢。點解唔俾佢自己揹？咪當做運動囉，而條死肥仔仲眼超超咁，好似「老憑」咁。阿婆養大佢老豆老母已經夠晒，仲要揍呢啲咁嘅死仔飽，阿婆，你真係苦命囉~