今晚當我搭緊巴士返屋企、正沉醉喺上海話版「海上花列傳」嘅時候，身邊突然傳來高分貝嘅男子講嘢聲音：

都唔知有冇搞錯... 恆溫？啲乘客個個都要攞衫著 (唔通個個打大赤肋？)...  你哋成日都話跟進... 有晒報告？咁點解0架0架車都咁凍吖(純粹個人觀感，只係大風啫，而且可以刪細或者刪晒個風口0架嘛...再者，個風口都吹唔到佢...)？都唔知有冇搞錯... 成日都話跟進... 咁點解0架0架都咁凍吖？

如是者同一段說話內容，以唔同組合出現，嘈咗5分鐘之後，佢終於肯停口...

其實只係一個「講電話靚女」(呢個係一個新嘅形容詞，自認靚女嗰啲，都會喺巴士上不停講電話)攞咗件外套出嚟著，係「靚女」(自認靚女嗰啲，都會喺上巴士之後馬上披外套，因為靚女係弱不禁風、弱質纖纖嘅...)都會咁做0架啦，好出奇咩？佢真係未見過靚女喇...

有感一：點解當時我唔用手機影底佢放上YouTube？

有感二：呢篇嘢好酸葡萄，因為我一直靚女前、靚女後 ... 靚女(不論自認定係公認)真係好煩0架...

Yvonne話過每一個人都有一個shopping死穴 - 我嘅死穴係影音及電器。

讀字幕翻譯嘅好處，係我可以有大條道理買DVD - 唔係VCD，因為畫面靚啲、啲聲靚啲、多啲function ... 如果DVD真係太貴，我先會買VCD；又如果VCD真係超平，就算DVD已經好平，又或者我唔知套戲係咪真係咁好睇，我都依然會買VCD。

呢個weekend我就有5套嘅收穫：

• Pink Floyd The Wall
• Love is a Many Splendid Thing
• Shall We Dance?
• Saving Face
• Little Miss Sunshine

再加埋屋企一大堆未睇嘅碟，我可以3年唔駛入戲院睇戲 - 好難喇~ 我都要睇首輪電影0架嘛 ...

呀 ... 仲未加上我最近買咗同將會買嘅電器。今次大大鑊啦 ...

急症室 - 去就去得多，第一次係自己要睇醫生。

我真係要讚自己，零晨4點幾一個人去急症室睇醫生 - 出門口我仲記得帶嘢去織，因為我以為會好多人、要等好耐。由出門口去急症室到返到屋企都唔駛半粒鐘。

冇乜咩特別感覺，因為一切都好快。不過我就好眼瞓 ...

今日同老豆去醫院覆診，比我發現到兩樣嘢：

喺覆診預約紙上面有寫，如果失約兩次，要醫生信先再可以排期；而呢段文字只有中文。係咪只有香港 / 中國人先會「甩底」，外國人唔會？定係外國人唔會睇公立醫生？

我終於知乜嘢係「睇醫生」喇。「睇醫生」開宗明義就係睇住個醫生 - 因為今日我就係咁，一入房就係咁望住個醫生睇電腦record，同醫生對答時亦只可以睇住佢個頭頂 - 因為佢由始王終都係「埋頭苦 "看"」。

又一個例子見得人多見識多 ...

原來依家啲郵局啲職員好好人0架，會建議你用乜嘢方法寄嘢，可以最平最快。

今日我去寄棉花糖比遠在英國嘅HoHo，點知郵局入面嘅姐姐話： 睇吓咁寄(包裹)有冇「so」先？嘩~ 好貴喎~ 你寄掛號啦，用掛號寄先100零蚊，當包裹寄要成200蚊0架~而且仲可以會快啲添。過隔離條隊啦，平好多0架~

就係咁，我再花多5分鐘排過另一條隊，就比少70個大洋喇~ 郵局姐姐你真係好人 ...

給有緣人~

這週是世界好友週，如果你願意，請把這條信息發給你所有的好朋友，也包括我。看有多少人會回發給你。
 
當大部分人都在關注你飛得高不高時，只有少部分人關心你飛得累不累--這就是友情，再忙也要照顧好自己，朋友雖不常聯系卻一直惦念，天涼記得多穿衣！世界好友週快樂！
 
少喝奶茶，不吃剛烤的面包，遠離充電電源；白天多喝水，晚上少喝；一天不喝多于兩杯咖啡，少吃油多的食物；最佳睡眠為晚上十點至早上六點；晚上五點後少吃大餐，每天喝酒不超過一杯；不用冷水服膠囊，睡前半小時服藥忌立刻躺下。
 
睡眠不足八小時人會變笨，有午睡習慣的人不易老。手機電池剩一格時不要打電話，剩一格時輻射是平時的一千倍，還要記得用左耳接電話，用右耳會直接傷害到大腦。
 
看到了就轉發給每一個你珍惜的朋友！ 

真係見得人多見識就自然多，今日我又大開眼界。 

話說上星期六有個疑似「成功人士」嚟我公司做talk，幫襯我哋部汽水機「買水」。點知部機唔生性，「蝕」咗佢五個半咁大把，就即刻同我哋啲staff講；我哋啲staff又好緊張咁同一個無關重要嘅部門經理講，嗰個乜都要經佢嘅「經理」又同我講話又乜又七。好~如果你(哋)覺我嗰五個半咁大，我即刻比番你(哋)囉。

其實就咁少嘅事，可以睇到啲人可唔可以成大器。原本嗰啲自以為幾咁成功、幾咁有能力嘅人，focus嘅唔係個問題，而係錢。我豪五個半比你(哋)又如何？比人知你冇sense、怕死又夠好玩啦~

真係好好笑~

呢個科目其實好可以滿足我對電影嘅愛好，但做起功課上嚟，又有啲令人煩。

首先，英文唔係我嘅第一語言，要聽英文再評論有冇譯錯、譯成點絕對唔係容易，更唔駛講將中文譯成英文比老外睇。

今日係我第三次睇「Closer誘心人」(唔係成套，只係一半)，還好嘅就係套戲越睇越覺得好睇。原來故事入面每一句對白都有玄機。Strangers、 Aquarium，仲有劇中人講嘅每一怡說話都有骨咁，要觀眾慢慢「啃」...

不過上一次做配字幕就真係做死我 - 唔單只要譯，仲要將字幕分句，再擺上條片度，唔可以太快出字幕，亦不能太慢，做完對眼好耐都對唔到focus - 因為對眼「哄」太近個mon ...我依家聽到「五星級大鼠」個名都仲有啲驚。

比我做完聽日個presentaion，就可以用一日嘅時間寫呢個commentary，然之後先可以睇我自己想睇嘅戲喇。

努力呀~ 見到家鄉喇~

做乜今日咁多過路人入嚟參觀我個blog嘅？21個，真係意外喎 ...

仲有唔夠一個禮拜，我就可以暫時甩難。

星期五晚做presentation

星期六晚11點59分前要交paper

下星期二做另一份presentation

其實工作量唔係太大，但總有壓力。特別係份paper，又嚟3,000字，評論一套電影「誘心人(Closer)」。呢套戲我一向都覺得有沉重嘅感覺 - 男女嘅關係原來係建立喺性同謊言之上。而且要comment嘅嘢又多 - 由文化到字幕都要講及，都幾「蝦」人~

等我星期六先死埋佢，下個禮拜就可以休息一陣，再為另一份paper衝過喇~

P.S. 希拉莉喺德州嘅選舉勝出，似乎真係好風迴路轉 ... 奧巴馬會唔會成為美國第一個黑人總統？而希拉莉又會唔會成為美國第一個女總統？大家拭目以待 ...