好嘅演唱會一浪接一浪。繼張學友之後，今次係陳奕迅。

本以為係一個聽靚聲嘅show，點知有驚喜 - 佢跳舞都好掂，而且fans比較年輕，所以氣氛好high。三級嘢？我唔覺喎~ 可能比media嘈，減咗啦。但我覺得無必要。做舞台劇都有全裸啦~ 老套~！！！

對個show有些少微言。係，為咗視覺效果換多啲靚衫係好，但陳醫神係咪換得太多呢？兩三隻歌就換一次喎 ... 我唔怕你浪費我時間，換衫嗰個人都攰啦~

But anyway，another good show~  期待13號林憶蓮個show~

對我嚟講簡直係午夜場 - 11點45分先開機睇呢套戲，睇完都成2點鐘，好攰呀~

睇完套戲，有啲感觸：原來人係生活喺謊言入面。當你講咗第一個大話，你就要用千千萬萬個謊言嚟為呢個謊言完謊。有善意嘅，亦有啲惡意嘅，仲有啲係為吹噓而講嘅 - 各色其式，總有一款啱你~

不過鐵石心腸嘅我，會將事實和盤托出 - 有乜好呃？遲早都知道真相嘅 ...

晚上11點幾，終於譯完今個月嘅稿，攰到想死。聽晚上堂仲要做presentation。想喊~

不過未瞓得，仲要睇重播House 醫神。聽日返工一定釣魚 ...

今朝氣溫22度，唔凍唔熱，最適合瞓覺 - 不過too bad要返工。

天涼好過秋。

從幾時開始我哋啲唐人會慶祝萬聖節？第日鬼佬會唔會慶祝清明重陽？

小小智識 - Halloween其實係解作「諸聖節(All Saint's Day)嘅前夕」，唔知點解，有人將呢個意思扭曲，由諸聖節前夕變成萬聖節。  But anway, who cares?  有得玩就得啦~

對於花園街你有乜嘢感想？逼？嘈？污糟？平日我都有啲咁嘅感覺，但今晚就冇喇。

一場突如其來嘅雨，令好多人措手不及 - 冇帶遮嘛，所以個個都行埋啲有瓦遮頭嘅地方。好似女人街呢啲咁樣冇遮冇擋嘅地方，就鬼影都冇隻 (鬼影都冇隻？唔應節喎...) 所以有帶遮嘅我就可以橫行無阻。

落雨天嘅花園街都幾可愛...

喺Marketing有一個term叫「Impulse Purchase」，即係話引起啲人嘅一時衝動而買嘢。我無呢個問題，但我有Impulse Cut，因一時衝動而剪頭髮。我琴日就剪短晒我把頭髮。好爽~

一年一度嘅秋天又到喇。除咗郊遊燒烤，我嘅年度活動係 - 編織。

成日覺得身為一個女子，唔識女紅編織係我兩大恥辱。因此，每年我都要做吓呢啲手作仔，希望技術有所改進。不幸，到今日仍未有顯著成效。

我依家鈎緊一件三角形嘅披肩，又睇吓我幾時可以完工，製成品又可唔可以見得人啦~

人嘅本能真係好不可思議。我最新發現我其中一項本能係同電腦有關。原來就算我點攰，我都會熜電腦，同埋我已經練成「倒頭便睡」神功，個頭一掂到枕頭即刻可以瞓著 - 當然間唔中有失靈嘅時候。

不過今日唔可以咁做 - 我又要趕功課呀~  

好好玩。當人人都話海洋公園嗰邊好「行」，呢邊就比人意外驚喜。唔係好多花巧嘢，只係一間Haunted Hotel，同一個Night Parade，就已經令人好surprise。

其實我整個行程喺夜晚先開始。我4點鐘到，用咗45分鐘排鬼屋，又用另外45分鐘排隊同Chip & Dale影相；再行shop，買完嘢，meet埋Nancy先開始，到9點半離開。時間唔長，但好充實。

如果有機會去到香港迪士尼樂園，試吓去城堡後面、小飛象同旋轉木馬果邊睇煙花。你可以見到其實啲煙花係喺四方八面咁射向天空。可能條頸會攰一啲 - 因為要向上「岳」同四面轉，但會有另一番感覺，而且仲好靚添~

我好鍾意香港迪士尼樂園呀~

其實點解要寫blog？我都唔係好知。開始時，係因為想寫日記，但又懶寫字。打，好似快啲、型啲，同high tech啲。慢慢發現有其他人睇我個blog，就有啲覺得自己係「才女」嘅感覺，開始為寫blog而寫blog，諗嘢轉牛角尖、為賦新詞強說愁。

其實為乜啫？我寫blog就係寫blog，冇人睇又如何？我只係想係記底一啲我想要記嘅人同事，他日等我死嘅時候，同我一齊灰飛煙滅。FYI - 我已經選擇火葬，再將骨灰撒入海中，費事麻煩。