當時間如流水流吓流吓又一年，再懶嘅我，都唔可以再任由自己差到無人有嘅皮膚再差落去。所以走咗一轉韓國，就入咗好多貨。

其實早於兩、三年前Blanche已經向我推薦Laneige啲產品，而舊同事Gloria更送上sample比我用，只不過自己懶，無用到。但自從知道Laneige出咗隻設計型仔嘅Sliding Pact之後，就對佢啲產品產生興趣。咁啱今次又去韓國玩，就順手買啲。就係咁，一向自制能力超強嘅我，都買到失控。由洗面、爽膚、日/晚霜，以至去死皮、保濕，全部買齊。就係因為大額投資，所以就一定要用，唔係就會浪費。

正因為咁，近日皮膚真係有少少改善。繼續用落去，皮膚會唔會好似啲明星咁靚？(我當然知做得明星皮膚一定唔會靚得去邊，但起碼啲廣告拍得佢哋啲皮膚真係好靚 ...)

FYI - 韓國只賣當地出產嘅產品，所以市面上嘅Laneige Water Sleeping Pack加強版喺韓國跟本得賣，因為呢隻產品係上海生產嘅。唔好再叫你哋啲朋友喺韓國幫你哋買喇~

仲有，如果跟團去韓國時，個團有可能會帶你哋去梨泰園嘅Laneige專賣店買嘢，你哋真係要諗過，因為喺普通藥房賣會仲平；而我去明洞買嘅價錢就同藥房差不多，不過就有一大堆sample，感覺好抵~

今日都可以講得上係正式work from home，不過我take咗一個long lunch，走咗去鰂魚涌meet我兩個靚女舊同事。席間我哋講吓呢樣、講吓嗰樣，比共事嘅時候真係開心好多。可能係因為我哋已經唔再有乜嘢利害衝突啩 ...

Work from home嘅其中一個壞處，係我嗰個歲半嘅姪女，經常走入我間睡/工作房叫我同佢玩，攪到我唔可以專心做嘢；不過呢個都係好處，等我唔駛做到唔停。MuiMui真係super cute~

返咗兩日新工，感覺好得意。雖然我老闆係同以前一樣嗰個，但感覺上我就比以前惡咗，有乜講乜。而且要handle嘅嘢比以前多好多，其中包括計糧、計假等等，好challenging。

不過，我依家係honeymoon period，唔駛成日返office，可以work from home，所以我有好多好多時間搵人食lunch。好free~

Beth嘅家姐終於做完我份運程預測 - OK啦，都仲未到農曆三月。

其實喺幾個星期前佢急急忙忙打咗個電話比我，問我係咪辭咗工？可唔可以收番？因為佢好似推到我今年唔適合轉工。諗番我個答案都幾妙：都辭咗工仲通晒天，一定要走架喇！唔緊要啦~呢啲可能係個天註定，我要做啲唔應該做嘅嘢。整定嘅~ 無所謂啦~

See~ 咁就已經比人一個定檔嘅感覺 - 原來我都唔係一個緊張大師嚟嘅 ...

其實，呢篇嘢應該喺琴日打嘅。有一部電影話過「Tomorrow is another day」，所以我話「Today is another day」。

期待已久嘅一日終於來臨，感覺有啲得意，因為我已經超過7年無轉工。但係又無乜緊張，因為我會見到熟悉嘅面孔。

算命老師話我係爛/濫好人，今次我過檔去AK果度係為咗幫佢，定係為咗自己？我真係唔知 ...

啱啱睇刺青果陣，一啲唔好笑嘅場面竟然有人笑。我唔明。其中梁洛施同楊丞琳嘅床上咀戲，啲女嘩嘩仲聲。死未？！

如果因為expect片中有兩個女角嘅床上戲而睇呢部電影，你一定失望。床上戲係有，不過唔火辣，仲好有美感，而且仲只係限於kiss scene。楊丞琳依然係楊丞琳，太可愛喇~ 而梁洛施嘅「小男生」同淡妝造型，好俊。

As a whole，部戲都幾OK，只係梁洛施嘅國語同唯一一句嘅日文對白發音有少少得意囉 ...

一個無離愁別緒嘅last day，個個人都話我好開心。係呀~重生又點會唔開心喎。不過，Melody同我講，記得要返去(公司)坐吓，要記得返「外家」。一個唔係咁識中文嘅華人，都知道「外家」嘅一個女人嘅重要，好warm~

又到say goodbye嘅時候，Yvonne叫我入房，送咗一隻我咁大個女戴過最貴嘅錶比我。佢話：平嘢呀姐睇唔上眼。咁~喺佢心目中，我又係咪貴嘢？

因為知道我有啲唔開心 (不過最重要係知我八卦)，Alice帶我去台北市行天宮拜神。佢話果度好靈，所以亦不仿一拜。反正滿天神拜都只係導人向善，而我亦只係求心安，咁佢哋乜門派，又有乜分別同關係呢？

算命老師 (台灣人尊稱有專業知識嘅人做「老師」，而香港人就叫佢哋「神棍」！)話我要再溫柔啲、要同男人「裝可愛」先可以搵到真姻緣 ... OK ... 我試吓啦 ... 不過睇完之後，呢隻老歌就喺我個腦果度唔走：

感情的段落 - 林志美

既是決定要怎不想相強，
心知挽留仍無望，
不復存幻想，聚散亦平常，
不必多說盼望原諒。

快樂似是已經走失方向，
它跟愛神同流浪，
心靈難複通，像隔一道牆，
若決定分開不勉強。

愛的歌，從此不輕唱，
為種種難忘印象，
一個心看不出有兩樣，
誰料已受傷不想歌唱。

快樂故事我今天想多看，
一章看完再一章，
忽萌奇想怎麼不看相，
問哪日戀歌可再唱。

我諗我真係唔適合跟團 - 因為我太聰明喇。

你知旅行社啲導遊同領隊嘅薪水極之可恥，佢哋收入主要係靠小費，同旅程中收取一啲巧立名目嘅費用。話乜嘢幫我哋安排好啲嘅午 / 晚餐(跟過團嘅朋友都知，啲嘢食真係「屎到痺」)、去邊度邊度(因為行程中不斷帶你去買乜買物)。但唔好做得咁「肉酸」啦~一家四口嘅「海鮮餐」遵只係一條魚、一細堆蜆(唔夠一斤)、幾隻扇貝、一大堆唔值錢嘅海腸 ... 你估幾多錢？港元1,600蚊正。1,600蚊呀~7個人都夠有多啦！佢去搶都無咁多呀~

而且有啲行程唔係一定會去某啲景點咩？點解要再收錢？係咪行往表唔寫但又有去就要收錢？好似打劫呀~

不過算啦，人哋要養家，我唔落疊就算啦~

呢一兩日新聞版同娛樂版都跟緊，蘭州女子來港追星不成，父親跳海遺屍香江。(我作0架，好文彩啩~？)

琴日見報紙話呢兩母女返咗去大陸，唔理個老豆條屍，仲要香港政府攪掂；今日免費小報仲話佢哋要求劉天王道歉。我唔係劉天王粉絲，但都覺得佢哋「忽」上腦。唔好話佢係一個咁出名嘅公眾人物，就算係一個普通人，你話見就見、話點就點？就正等於你打劫銀行失敗自殺身亡，政府又要負責啦喎？

痴粉線0架 ...