劉小姐同台灣首富郭伯伯嘅事件，令一眾梁先生影迷扼腕。好多人唔明，劉小姐點解要離開一個對自己不離不棄嘅男人？當日某雜誌刊登佢比人影嘅裸照時，邊個喺佢身邊支持佢？錢係咪真係咁重要？

我哋局外人永遠唔知點解。有無可能係梁先生唔肯同佢結婚？又或者有其他不為外人知嘅原因？

我作為一個普通而正常嘅人，會覺得如果劉小姐真係離開梁先生，而轉向年老多金嘅暴發戶，絕對唔可以原諒。但如果站喺劉小姐嘅立場，又有可不可？自己年紀都已經唔細，又開始年老色衰。再唔泊返一個大碼頭，下半世都唔知點算。

唉~！問世間情是可物，直教人生死相許 ...

(1) 今日，我第一次去我嘅新office。個floor plan話我間房有87呎。Good呀，我屋企間睡房都只係得49呎。大好多喇~！

(2) 今日去旅行社開茶會。10幾年前第一，亦係唯一嘅一次跟團，開茶會時係真係飲嘢咋，仲係一人包果隻。今日，好好多喇！自助飲品，你鐘意飲幾多都得；仲有麵包、蛋糕任食。感覺幾幸福~

(3) 今日上律師樓簽契。我大筆一揮，從此就無liability喇；我大筆一揮，就有一張大額支票過我手 - 感覺都幾過癮架。

(4) 今晚，去完律師樓搭巴士返屋企時，途經銅鑼灣前避風塘，看到尖沙咀嘅夜境。我覺得一啲都唔靚，但係喺山頂睇好鬼死靚架喎？？？係咪因為太近？同一道理，咁係咪睇乜嘢都退一步就會睇真啲呢？唔怪得發哥話退一步會海闊天空啦 ...

星期六晚同台灣朋友上MSN傾到差唔多顛咗。我唔知佢哋兩個點，但我就笑到差咁斷氣。

事源係復活節之後我要去台灣出差，就諗住話比台灣啲friend知，約埋食飯。就係咁Claire話比我知，佢有個男同事會喺同一日到台灣。點知講吓講吓，原來果個人同我同一班機。Alice就問唔知會唔會係一個romance story。就係咁，Claire就開始形容佢呢個好好人嘅男同事，仲話要介紹比我，不過要先查吓佢咗結婚未，又話要搵張相比我睇。一時又講到點先係好男人，又講到有乜計劃可以拉埋我哋 - 講都好似真咁。

其實，成唔成事唔係重點- 大家都係吹吓水啫。重要嘅係一啲遠在他方嘅人，都關心你嘅將來同幸福，真係好warm~ 我就唔會因為朋友對我嘅關心左諗右諗，咁樣我會死得好快~！

不過我都想見吓果條友係乜水~

<3月27日: 琴晚Claire話我知條友結咗婚喇~ 都話啦，好男人通常都比人mark咗架啦~>

上個禮拜我撞牆，到今日我隻眼仲瘀瘀黑黑。前幾日公司有個白癡妹問我係咪家暴？如果係，你估我仲會唔會返工？就算敢返工，仲笑唔笑得出？我唔需要同任何人交代，我發生咗乜嘢事，關心我嘅人會自動問我。

自從上個禮拜辭職之後，呢幾日心情平靜到不得了。依家我嘅目標就只係盡自己動力，幫我嘅朋友完成佢哋嘅工作。仲有10幾個工作天，我就會離開呢間公司。呢度啲人係生係死唔再係我嘅concern。

我依家心掛掛嘅係復活節個假期去韓國，之後台灣個trip，同我一共可以攞返幾多錢走人。每一日過去，就代表我離開嘅日子又近啲喇！

今日我真係「受傷」喇！

前幾日有條韓國臭四想點我做嘢，話如果唔做我就無capability。話真，我唔係好明佢講乜，但就真係比佢啲驚人嘅英文嚇親。先先見到真係好「慶」，所以就將個mail send比我美國個老板睇，希望佢幫我主持公道。點知佢仲絕，佢話佢完全唔知佢講乜，問我知唔知？呀，即刻心都涼晒。我唔capable，但起碼美國人明我講乜，人哋就唔明你啲英文，咁你話你有幾capable呢？嘩哈哈...

不過，我今日真係喺心理同生理上都受傷。事源今日去做gym，上class前攞住樽水入studio，點知就係咁衝撞埋塊玻璃門度，痛得我哎 ... 而且隻眼仲立即，係馬上腫咗，痛到依家都仲好痛。唔單只咁，隻眼仲開始轉黑。你話哎，我聽日點出街？而且成個class啲人都聽到我撞埋玻璃嗰一吓聲，瘀到爆呀 ...

我隻眼真係受咗傷呀 ... 我咁瘀都真係心理受傷呀 ...

自從我將我要離職嘅arrangement攤開嚟同我ex-ex-boss傾，我對佢就觀感就一直向下調。

我唔係想bad mouth佢，但我覺得我同你傾係因為我respect你，唔係希望你幫我spread個news比全世界人知，包括一啲唔喺呢間公司嘅人。呢啲係我同ex-boss即將來老闆嘅決定，唔需要比一啲局外人知道。所以聽到佢同其他人discuss呢件事，我有啲唔開心。

仲有，as a reasonable person，無人會鍾意比人「踩」。佢話我無HR同公司裝修經驗，邊個一生出嚟就有？問題係你願唔願意比我呢個機會。定係有以為我同舊/新老闆有啲乜嘢？

原來女人都係長舌同小氣嘅 ...

一切已成定局。

今日，我簽咗第二間公司嘅offer letter。今晚，我向美國嘅老板遞辭職信 - 其實係e-mail。

仲有一個月，我就會離開呢間我渡過咗差唔多8年歲月嘅地方。話唔會唔捨得就呃你嘅，但呢間公司真係令我又愛又恨。喺呢度，我認識到點做嘢先係「pro」，認識一班一齊捱嘅同事；而呢度亦都令我失去呢班好同事。所以我封辭職信嘅第一句係「I'm blessed...」

時間再一次開始倒數，今次我係主角 - 唯一嘅主角~

近日煩於決擇取捨。繼續留底定係離開？仲有，我可以信邊個？喺職場中，因為利害衝突，無乜邊個喺你身邊而你又可以相信。呢啲就係人性？真係可悲。

不過，呢個可能係我最後一個可以掌握嘅上位機會。唔好好把握，我一定會後悔。所以，請祝福同支持我 - 呢啲係我依家最需要嘅。

可能我個人比較市儈，但我真係好唔明，點解啲人會咁鍾意將啲戲呀、CD呀擺上網比人download。我係用家當然話好啦，但佢哋呢？無so喎，又容易比人告，有乜謂呢？

氣溫喺一夜之間跌咗10度，微風細雨，由和暖變微寒，身子差啲都唔得。但呢種咪正係我最鍾意嘅天氣？有啲sad，灰灰沉沉，正合我「何車」。

春天唔該你唔好嚟，拜託拜託~！

P.S. 2007年3月7日，朝早氣溫仲跌到11度，香港啲醫生想唔發都難。