1.  今朝聽收音機，廣告中問咗一條問題：你7歲時諗將來會做乜？我打咗一個「突」 - 原本我從來都作過乜嘢「我的志願」嘅文，所以我從來無諗過將來會做乜。又係喎，我咁大個人，好似到依家都唔知planning係乜，只係一個「船到橋頭自然直」嘅忠實信徒。我知個天都仲係幾錫我，所以我今年嘅願望係個天依然咁錫我。

2.  我的志願 - 曾經聽有好多人問呢個問題(不過唔係問我)，我細個時會諗做護士，因為佢哋成日同BB嘅我打針(我細個好多病)，所以我要報仇。但大個咗知道，理想係美好嘅，現實係殘酷嘅，就唔再諗乜嘢理想、志願。飽唔死、餓唔親就算。

3.  Wish List - 我知好多人喺心目中有一張咁嘅表。我無。年紀越大，越唔注重物質享受。有錢，食好啲食飽啲；無就乜都得。我意志力好得人驚，試過有一次無錢/懶出去食嘢，就催眠自己眼瞓，瞓咗就唔肚餓 - 得咗，又慳一餐。死未？！

估唔到喺我去美國之前搵到啲咁嘅正嘢。呢套係我matric時日日趕返屋企睇嘅sitcom / soap。逢星期一至五，下午六點，明珠台。

就係喺呢個時候開始我迷上Michael J Fox。唔好話佢細粒，佢果時真係好cute，而且佢近年仲戰勝柏咗金遜症。你都咪話佢唔勁~

我依家煩緊嘅係買正版定BT好？仲有James Cameron嘅「The Lost Tomb of Jesus」，幾時香港先有得睇？？？

去到英美國家你講乜話？去到台灣返到大陸你又講乜話？啲有識之士去到歐洲、日本又會講乜話？外國遊客嚟到香港時，我哋要做佢哋生意我哋又要講乜話？講乜都好總之就唔係講廣東話。

好唔公平，點解比錢人賺都仲要就人哋？係咪香港人蠢，為咗要人哋覺得你叻，就要事事遷就人哋呢？

我開始有啲明白點解一個曾留學外國嘅鄧小平喺接見外國元首時死都唔肯講他國語言喇~

啱啱得閒做咗個test，不過唔係好知究竟我係乜嘢性格：

第三型：成就型(Achiever)
你精力充沛，總是動力過人，因為你有很強的爭勝慾望！你喜歡接受挑戰，會把你自己的價值與成就連成一線。成就型的你會全心全意去追求一個目標，因為你相信「天下沒有不可能的事」。動力十足的你，最好做leader帶領其他人啦！

今日忽然靈感如泉湧所以又有嘢講。

一向唔係周星馳嘅粉絲，因為有時佢啲片實在太無里頭。但佢嘅「月光寶盒」同「仙履奇緣」就係我嘅all time favorite。佢果段「曾經有一段愛情喺我面前我唔珍惜，到失去先嚟後悔。如果要我同佢講一句說話，我會講我愛佢；如果要喺呢份愛加上一個年期，我會話　．．．　係一萬年。」（如有錯漏，請見諒。）簡直殺死人　－　睇我差唔多背得出晒就知啦∼

過年前只係見到呢兩套申只係出box set，百幾蚊對慳妹我嚟講真係好貴，所以今日一見到有VCD就即刻買　－　30大元兩套戲呀∼真係抵　．．．

為配合農曆新年嘅氣氛，今日我嘅午餐係一碗金碧輝煌嘅 ... 出前一丁XO醬海鮮麵。

呢個係另一個活生生嘅慳妹血淚史。為咗慳錢，唯有喺office食杯(碗)麵，我仲要用熱水開埋啲XO醬料唔好浪費。真係邊個婜咗我實無死~

好耐無update個blog，係因為近來個人進入咗一個前所未有咁亂同懶嘅狀態。每日個腦有好多好多嘢諗，但又「的」唔起心肝打嘢，就係咁坐喺部腦前面「發吽斗」，簡直你浪費青春 - 不過還好我都已經無乜青春可以比我浪費。

放完年假又要返工，不過又無心機做嘢，唯有繼續呆坐等放工。

新年你會去邊？睇戲？唱K？瞓覺？喺大年初一，我去嘅第一個地方係東區醫院急症室。因為母親大人腸胃炎。哈~

一般服務行業會希望客似雲來，但急症室嘅醫生就希望生意淡薄。我好欣賞佢哋嘅敬業精神、苦中作樂。比我？塊面一定黑過個鑊底。我依家就好想瞓~

祝各位身壯力健，萬事如意。恭喜恭喜~

To Everyone ...

Happy Valentine's Day~

身處印度Bangalore，一間自稱為五星級嘅酒店。我喺門口嘅第一個感覺係：唔係呀嘛？點解個Reception無人(staff)嘅？

印度可能地方大，唔值錢，所以房間好大。佢想造出hip hotel嘅格局，所以好多金屬嘢。但金屬呢家嘢好「蝦」人，「令」就係hip，唔「令」就係污糟。呢度就比我污糟嘅感覺。

花洒 ... 外國五星級酒店會有heavenly shower，水柱嘅水力集中；但呢度就水花四散，沖涼一定要連埋洗頭。

最經典嘅係佢乜都有包裝，但個袋仔就唔係甩色就溶溶爛爛 ... 唉~

我唔係想咁picky，但當你用咗10幾個鐘頭，飛咗咁多個鐘先去到一間咁嘅酒店，我諗你會有同感。