喺張學友個演唱會聽到呢首歌，令我諗起我兩個朋友 -

給朋友 - 曲、唱：張學友 / 詞： 古倩敏

2003年12月　喺朋友口中知道你已經離開
心裡面痛左一痛
面上搵唔到適合既表情去表達我自己
做完野之後　我自己渣車返屋企
覺得特別凍　啊　原來冬天已經黎左啦

飛出生死峽谷　輕卸身軀的包袱
如閒來沉睡了　一覺甦醒多舒服
唯求旁人別哭　加重不必的傷痛
讓我輕輕鬆鬆　活到這一分鐘
像到異地另做美夢

＃北風開始急促　緊記多加添衣服
　如能全明白我　總會將哀傷征服
　神遊無涯時空　千里可一刻飛縱
　沒世間的擠迫　讓我偷些空隙
　今天可好好的休息＃

＊靈魂仍然在飛　想找青蔥的一片地
　停下再看兩眼　便會安心高飛
　就算一生是極美傳奇
　如逢嚴寒天氣　亦有一番風光細味
　瀟灑再見世界　在這方的知己
　每一天都深深祝福你　即使遠離＊

一路上　我見唔到一個人或者一架車
特別覺得孤獨　打開收音機
只係重覆聽到報導你離開既消息
我望出車外邊覺得天色好黑　真係好黑

REPEAT＊

今日返屋企既路好似特別長咁
終於我都返到屋企啦　你呢

REPEAT＃

Excellent~

雖然個rundown同台灣果個一樣，但始終係廣東話，點都親切啲~

張學友依然係我嘅最愛。

紫苑，是一種花的名字，一種很不起眼的小花，像雛菊一樣有嫩黃的蕊，在花朿中從來不是主角。

唔怕生壞命，只怕改壞名。原來我嘅一生，已經喺我個名反映咗出嚟~

同女朋友仔偷嘗禁果，攪到女方珠胎暗結，男方不知所措，女方一力承擔後果，不理外界嘅眼光同冷言冷語，決心生個BB出嚟。

好簡單嘅劇情，就反影出男人嘅優柔寡斷，同唔肯承擔責任。

世上係咪真係已經唔再有一啲有擔當、英明果斷嘅男人？係咪咁，女強人就成為咗男人無用嘅副產品？

第一次唔鍾意打8號風球。(1) 我係Admin嘅人- 仲係唯一果個。所以我要係最後一個走同鎖門，不過，好彩有人倍~  (2) 近幾日多嘢做到想殺人，仲要打風早放工，我啲嘢邊個幫我做呀？  (3) 打風唔可以搭行東區走廊嘅車，即係要搭地鐵 - FYI，地鐵係我最唔鍾意嘅本港交通工具，而且打風一定迫到呀媽都唔認得。你話，打8號風球有乜好？？？

一向慳家嘅我最近成日買衫。事緣係我上次去台灣見到Claire啲大大碼衫都幾靚喎 - 請唔好用品評super model嘅standard睇我哋啲肥人，就有啲心郁郁。及後佢嚟香港出trip，我哋講到佢啲大件衫，佢就比咗個美國website我去check。價錢真係好平，但因為郵費貴，暫時作罷。再到同事Oscar話佢同一間台灣郵購公司買咗幾件好平嘅衫，我就終於出手買咗幾件，過兩日就寄到我屋企喇~

另一方面，我每日返工放工都會經過花園街，每日都會見到好多衫。就係咁，我就喺兩日內買咗好幾件衫。

今個月又要節衣縮食喇~

超悶熱嘅一日，最好就係睇戲。我終於睇咗HP7。

某程度上，我要多謝個導演，因為佢令一個又長又臭嘅故事嘅節奏變得明快。但另一方面，又有啲怨佢唔小心，點解可以比啲學生喺落火車嘅時候著便服呢？犯校規嘅喎？？？

夜晚又喺明珠台睇HP2。我一向都係麗音嘅支持者 - 就係咁我成日都比我啲翻譯嘅同學話我，配音個小朋友把聲好可愛。不過可唔可以將啲人名變番做George、Fred、Ron... 不過Hermione又難發音咗少少 ...

Vicky話HP6同HP7最好一次過睇完。所以無論我可唔可以喺下個禮拜睇完HP6，我都會攞咗HP7先，一次過睇完嘛 ...HP6真係好緊張，係HP Series中我最鍾意嘅一集。

真係同人唔同命。平日比人話係傻佬嘅九龍皇帝一朝仙遊，竟然可以上新聞版，仲有啲係頭條。哈~ 香港人真係好嘢！

曾幾何時，佢喺天星碼頭四圍寫大字，以前嘅市政局又要拉又要鎖。到有人發現佢嘅字係寶，話有本土特色嘅時候，啲人又當佢係神咁拜，攞佢啲「大作」印成布造衫。我好記得當年「皇上」係有攞綜緩嘅，唔知邊條友話因為有人買佢嘅大作而有收入，所以唔比綜緩佢。哈~ 咁「長毛」做咗議員，每月有幾萬銀收入，係咪要踢佢出佢住緊間公屋呢？

不過點都好，「皇上」已經仙遊，佢亦做到人死留名。佢喺九泉之下都應該覺得安慰囉~

回憶總是美好的。成日聽人講，但我最近先真正體會到。

記憶中細個果陣好鍾意食嘅嘉頓牛油卷好好味，成年後一直喺各大超市都搵唔到。上星期日終於比我搵到，所以情不自禁咁買咗一盒(12包)。返屋企諗住細細品嚐，但令我好失望，味道已經唔同。

我諗係我嘅記憶呃咗我。以前細個冇乜錢所以買零食冇乜選舉。一包當時係零食大牌子嘅嘉頓牛油卷，已經令我覺得佢好珍貴，味道亦特別好。依家人大咗變得咀刁，覺得乜都唔好食，只記得以前嘅好味道。就好似多年無見嘅舊人，點解同記憶中嘅樣差咁遠？係咪因為我唔喺佢身邊而令佢憔悴？(嘻~) 點解我身邊嘅所有一又無乜點變過？

Those were the days - 回憶總是美好的，沉迷喺回憶入面只會令自己更唔開心。算吧啦~

就好似一啲冇乜嘢做嘅外國女人一樣，我同Vicky、Sally話要組織一個小型Book Club，因為我哋三個都鍾意睇書(不過我哋都好忙)。就因為呢個club，我要喺兩個禮拜內睇完HP6，再借Vicky嘅HP7；而喺同一時間，Vicky就睇我嘅My Sister's Keeper，Sally就先完成佢嘅Gone with the Wind再加入我哋。

其實我話呢個唔止係Book Club，而且仲係Video Club，因為Vicky有大量冷門(至起碼唔係熱門)嘅DVD供應。就喺琴晚，佢就貢獻出佢嘅Tipping the Valvet同Hustle。

所以話，Vicky唔單上係我哋嘅Library，仲係我哋嘅Blockbuster。