對我嚟講，中秋節或者任何一個節日，除咗唔駛返工，或者可以早啲收工之外，都係一樣無乜意思。今日，一個so-called人月兩圓嘅佳節，我一個人，食飯盒做節。

我唔係complain乜嘢，只係有啲感慨。所謂嘅一家人都底係乜？我父母雙存，但係從佢哋，我完全感受唔到少少溫暖。有兩個阿哥又點？佢哋咪又係只會顧住自己頭家。剩底嘅，就只係我一個人 - 我自己一個人。

或者，我唔應該再天真咁希望從他人得到一丁點嘅注意。就好似我成日同人講：始終，過呢一生嘅係我自己。無論邊一個，佢哋終於都會離開我。遲啲不如早啲。

無寄望就唔會有失望。

近日公司嘅同事忙於公司開張等事宜，我一個小小Admin就好似乜都幫唔到手。當全世界人都OT到9、10點先放工，我就喺7點幾8點拍拍籮友拍拍手放工返屋企。所以我嘅名係「無義氣」。

又，琴日公司正式開業，當人人都有一個固定崗位嘅時候，我就乜都唔識，亦繼續幫唔到手。只可以喺同事做到頂唔順、喊嘅時候，安慰吓佢哋、比啲口立濕佢哋透吓氣，故我又名「慰安婦」。

我諗我多變嘅角色同身份，開始有向已故天后梅艷芳小姐致敬及模仿的趨勢。

公司開張，企咗一日個知客，放工返屋企後，發覺對腳好似唔屬於自己咁。沖涼時用大滾水「淥」對腳都無反應 - 真大鑊！！！

諗吓諗吓，中國人造字真係好「掂」。支晒啲力就係攰，把口有力就係叻。仲有啲粗口字，完全依足人嘅體型創造 - 試想像「門」字就係人嘅身體，「西」呀、「小」呀就係器官呀咁。中國人真係聰明同偉大喇~

究竟開心係乜？係咪笑就係開心？我有無開心過？如果有，係咪因為我已經透支晒，所以而家要嘔突？

我唔知我係開心定係唔開心，我只係 ... 好似再搵唔到笑嘅理由。

I mean喺我身邊啲人。我個極品老闆啦~ 我啲眼中只有自己嘅同事啦~ 有啲煩死人唔賠命嘅人啦~ 唔該理吓我嘅感受得唔得呀？

好好笑，公司啲妹妹話一定要加headcount比我，唔係死梗。唓~ 有乜咁大件事啫？我做唔到咪唔做囉，外面大把人做得比我好。個地球唔會因為無咗邊個就唔會轉嘅 ...

Michelle真係好想辭工 ...

我早出晚歸。

翻叮隔夜小籠飽做早餐，點知飽入面啲煬熱親條脷，成條脷啲味蕾差不多死晒。

我真正知道乜嘢係食不知其味。

同Sally講到點解好多freak都係男性，我話因為係男性主導社會，所以所有形容詞都係有關男性為主。講完唔夠3個鐘，事實証明我係錯嘅。

今晚喺堂上讀一篇有關逃難嘅短篇故事，名叫An Old Man at the Bridge。老師叫我哋睇完做discussion。第一個問題係對原文有乜感覺。有女同學講：佢話呢篇「文章」(呢個係「短篇故事」)嘅作者「海明威」(其實上係「佚名」，而老師亦無confirm佢啱定錯，but who cares？)嘅寫作風格點點點 ... 又話呢個故事好masculine (？？？講一個走難老人同一個兵嘅對話就masculine？) 佢唔鍾意喎~

佢第二次嘅發言講咗一個好好嘅point，但佢話：就好似聖經咁，不斷重複又重複，好悶喎 ... Come on，聖經唔係leisure reading book嚟0架 ...

事實証明，freak，唔係男人嘅尊利 ...

好唔開心知道，學友因為病唔可以完成佢喺香港部份嘅演唱會，希望佢快啲好返，可以繼續餘下嘅世界巡迴演唱會之旅。作為忠實粉絲嘅我一定撐硬嘅。

睇到新聞知道有大陸觀眾因演唱會取消要報警。我諗喺佢哋心目中，有錢係唔係大晒？佢哋究竟識唔識尊重他人？我萬二分明白佢哋真係好失望，我諗學友本人亦一樣。對於一啲認真、地位祟高嘅歌者(喺我心目中，學友嘅地位都幾超然0架，而且仲係一個對自己有高要求嘅出色藝術家)，佢哋嘅focus係自己嘅演出水準，唔係多開一個show就多賺幾個錢。不過我諗啲暴發戶係唔會明0架喇~ 有錢，佢要你死都得 ...

究竟大陸人啲「水平」幾時先可以提高？