早一陣子一直為「驕傲」同「自卑」兩個詞話諗到頭昏腦脹。直到養傷嗰幾日，好似又有啲新領悟。

其實對我嚟講，呢兩個只係形容詞，對佢哋嘅定位非常因人而異。我一直在乎嘅，只係個人感受。驕傲又點？自卑又點？呢啲係完全、非常、極端、無可置疑嘅個人感受，點解他人要我 / 我要迫自己認同人哋嘅definition？好奇怪，一啲都唔似我~

最後一日病/傷假，絕不展期。 今日一早返醫院覆診，還好復元進展良好，不過下個禮拜要再覆診一次 - 正好，老豆同一日覆診，我唔駛用大假。

受傷以來嘅陰影，越來越明顯：好怕會因今次小傷影響視力，畢竟我依家睇嘢仲係蒙查查。不過驚都冇用，唯有煮到嚟就食。

唔知邊個發明SMS，仲有中文輸入法，令我養傷嘅日子不至於太悶。

由於老闆外遊，不斷用SMS同佢保持聯絡，又打吓小報告，同同事傾吓計，今個月嘅SMS費用一定好「金」，還好有啲人係同台，唔駛錢。

不過不斷咁單起隻眼打SMS，我其中一隻眼嘅近視，一定比另一隻深咗好多。

電腦係我嘅死穴，所以就算只係剩番一隻眼用得，我都要開電腦。不過就係用唔得耐。

今日一大行程 - 去醫院睇醫生。原來有好多人睇眼科，不過還好我封信有「PRIORITY」(全大寫)，所以唔駛等好耐。只係來回醫院之間要行嘅腳程，令我頭暈眼花，又熱喎，如果唔係隻眼仲痛，我返工好過。

下晝，就係一直瞓瞓瞓... 夜晚又瞓瞓瞓... 終於又再腰酸背痛。養傷，其實越養越傷...

我唔知喺醫院啲人點樣，但我喺屋企「養傷」已經覺得好辛苦。

由於隻眼痛到打唔開，唯有閤埋對眼(只係閤埋一隻仲辛苦)，瞓喺張床度。雖然隻眼痛會令我好攰好想瞓，但隻傷眼又不停流眼水，令我瞓得唔好。天氣又熱，開冷氣又令個人好乾；飲得多水又成日要盲摸摸咁去厕所，瞓得床多又腰酸背痛... 總知苦不堪言。

健康真係無價寶...

知唔知世上最陰毒嘅係乜嘢招數？其中一樣係插眼。我就係咁受傷。

話說星期六睇完書展返屋企，同我個寶貝姪女玩嗰陣，佢忽然使出呢招，我一時無從反擊，就硬食一嘢，以為只係痛一陣就無事，點知到夜晚情況都冇好轉，而且仲越來越痛，唯有去急診室求診。嘩~原來隻眼有事，係會被分配到「緊急」嗰個類別嘅。

望聞問切，醫生先睇睇我嘅「傷勢」，問明原因，就開藥比我，叫我禮拜一去專科睇醫生。真係有效率~！喺急症室睇醫生一個鐘都唁駛喎！

依家(星期一朝早)我隻眼仲好痛同腫到隻牛眼咁... 勁樣衰 ...

有感：醫生有時好有想像力，我話同「小朋友」玩受傷，佢就喺封referral letter寫我同「her child」玩，「he 」插我隻眼。其實係同「her niece」玩同「she」插我眼。

每一年我去書展都有一個主題：旅遊書、言情小說、 英文小說，今年係食譜。我一口氣「掃」咗半打返嚟，好重。

其中一個攤位話100蚊有4本，仲可以入會做會員以後買平書。OK，反正都會買好多本，就入埋會。哈~入會贈品又多又奇怪，cute到有一包金鳳米一斤裝、兩包即沖麥片、4包蜂蜜、一塊眼鏡布... 仲有啲「騎尼」嘢，講唔晒。

真係配合番啲書嘅主題 - 煮&食。

因為公司離屋企都幾遠，返工放工途中會見到好多嘢。女仔鐘意睇人著衫，我亦唔例外，不過旺角特別多「騎呢」嘢~

有時人點著衫，會反映出呢個人嘅出身。我唔係指衫嘅價錢，而係著衫嗰個人嘅氣質。小家碧玉嘅，點都會保守啲，喺小背心外面都會加件外套；潮啲嘅，咪少啲布囉，小背心熱褲就一定唔少得。我見過最「雞」嘅，係一個看似20歲未出頭嘅女仔，外面著黑色網T裇(都幾疏吓)，入面一個粉紅色胸圍(可想而知件T裇嘅網有幾密，可以俾我睇清楚個胸圍嘅款同色)。仲有一個(不過佢可能係顛嘅)，晨早流流著deep V裙，露出著喺入面嘅肉色胸圍，一路行一路笑...

好驚呀~

放咗工，就應用返屋企。就因為今日早收工，諗住去個mall行吓 - 「行」，冇諗過買嘢。點知就係咁，唔覺意行咗入間boutique，買咗幾件衫同一啲喺公司可用可唔用嘅嘢返屋企。應驗咗今日星相話我有耗財星到訪。

無端端喺條街度行真係會破財0架，「無事出街會破財」，此言非虛。

今日係Chuck嘅生忌。可能對有啲人，Chuck 呢個人已經成為歷史，但對我，佢嘅存在與否，都唔可以改變佢係我朋友嘅事實，所以喺Facebook我嘅朋友名單上，Chuck依然榜上有名。

就喺今日，等我(哋)隔空同佢講一聲：

Happy Birthday

お誕生日、おめでとう。

축 생일