超攰嘅一日。係因為今朝喺新宿行嚟行去，掃100日元店，再返酒店，再出街。女人嘅小宇宙真厲害，100日元店都可以「掃」。

第一站係去行mall - 海浜幕張，途中品嚐傳說中嘅「駅弁」。已經行咗咁多日嘅我實在忍無可忍，買咗對新Nike鞋 - 再行，但實在行無可行，所以搭車走人。但的唔係返酒店，而係中途落車去東京迪斯尼樂園 - 門口。諗住行吓、買吓嘢，但真係買唔落手，香港果啲靚好多~影幾張相就走人，今次係去銀座。其實目的地只係一間叫做「玩具博品館」嘅玩具店。完全搵唔到我想搵嘅玩具 - 不過其實我都唔知我想搵乜~ 所以，算啦~!

銀座呢個地方真係好掂，乜鬼都貴到死，仲有係好難揾老麥。又一個節目令一行到半死~千呼萬喚終於到約定時間，食飯、講是非，又一餐。返到酒店又進行每次都有嘅重點節目╴收拾行李。

好攰~