事情嘅起因係日本著名嘅快餐連鎖店Mos Burger將於觀塘apm開業，而佢嘅米堡同蝦堡一樣出名，所以一場去到日本，點都要一試。

其實喺啱啱到步後，我就開始搵Mos Burger，但係搵唔到，就先行作罷。就喺第二日當我行到半死時，竟然比我喺上野搵到，咁就一定要食個蝦堡喇。由於係即叫即整，蝦堡上枱時依然熱辣辣。蝦餅彈牙、蔬菜新鮮而且醬汁美味。一個字 - 正！

Then，有一晚行銀座行到就死嘅時候，入去老麥一看，佢哋又有蝦堡喎，不過基於曾經話過唔會去日本食老麥啲飽，就只係飲汽水、食薯條蘋果批等運到。

Finally，琴日喺日本食最後午餐時，因為食到唔知食乜，乾脆走入Lotteria食晏 - 蝦堡餐。佢哋啲蝦堡都係即叫即整，但唔知點解唔夠Mos Burger果啲熱。奇怪~

之後由於喺腦海中出現做蝦堡一比拚嘅idea，就返轉頭去老麥買蝦堡，留返搭Narita Express時食。唔講佢係唔係凍咗，但塊蝦餅都無理由會散0架?!

以上三家快餐連鎖店係參賽者。比拚結果係由Mos Burger勝出。佢哋嘅蝦餅非常彈牙而且扎實；Lotteria嘅就有少少散，但還可接受。老麥就慘不忍睹，蝦餅又散又無味，實在令人失望。

Mos Burger就快喺apm開業。佢哋啲飽唔錯0架，比老麥係就係貴咗啲，不過物有所值。試下啦，你一定會話好(sorry，呢個唔係Pentene廣告 ...)！