你用乜嘢顏色嘅牙膏嘅呢？我屋企有黃色、白色、藍色，以前用過綠色，仲有藍白間、白綠間 ... 真係多「支」多彩。

喺我屋企，牙膏就好似我啲香水，唔同日子、唔同時間可以用唔同味或者唔同顏色嘅牙膏。

唔單只顏色、味道，仲有來自唔同國家。白色嘅係中國佳麗，因為兩老話用咗唔會咁容易有牙週病 - 而老豆亦因為用咗佢，牙週病真係好番。黃色嘅係本港代表 - 高露潔，不過真實國籍無人知。而藍色嘅靚女，係話自己來自英國嘅「大陸妹」。有時仲會有喺旅行時帶返嚟嘅日本妹、賓妹、泰妹 ...

十足十聯合國 ...