對於十年前嘅今日，你仲有乜嘢記憶？我記得都係一個下雨晚上，全家人一齊睇電視，睇住英國國旗緩緩下降，換上中國國旗，解放軍入城...我對眼就不停咁流眼淚。記憶中嘅1997年6月30號，係一個傷感多於喜悅嘅日子。
回歸10年，並未有令我對「祖國」產生一分一毫嘅歸屬感。我仍然話自己係香港人；攞特區護照係因為要搵一個「靠山」「保護」同「照」住。唔係歸屬，而係利用。
下一個10年會否令我對「祖國」產生歸屬感，尚係未知之數；但喺呢一個moment，我依然只會驕傲咁承認：我係香港人。
