今日約好左同Key、琪、浩、油佢地去唱K+玩NDS
我放工出到去之後佢地已經先到左K房
今次係第二次見佢地
所以一上到去就埋位有傾有講=]
唱唱下琪開始拎部NDSL出黎玩孖寶賽車
跟住就個個都拎晒NDSL出黎Join
(得我一個用緊至型既銀色NDS XD)
結果之後既時間都係一個人唱K其他人賽車
戰果當然就係我贏唔少
最尾埋單之前唱左幾首合唱歌
Cut歌前睇埋軟硬演唱會Aaron個Part對話
氣氛幾好=D
唱完K落到樓下等左一陣就差唔多無晒雨
跟住嫌未玩夠NDS既孖寶賽車
重去埋機舖打左幾舖街機孖寶賽車添
不過到左街機就係佢地既世界了V_V
我場場包尾拎第四V_V
打夠機之後轉場去左樓上Cafe食晚飯
今次去既係唔知咩大廈既20樓出Lift門左邊個間
(上個禮拜去完同一棟大廈既10樓)
環境佈置得唔錯加上梳化坐位都幾舒服
(可惜一班人掛住玩NDS唔記得影相)
而且個晚餐我都幾滿意
佢地幾個叫既好似係吉列魚扒三色螺絲粉(忌廉/蘑菇) $58
過左幾個鐘打Blog已經唔記得左添...
佢地幾個係落Order既時候重係度背呢個咁長既名-.-
(讀左十幾次)
我叫既就係...煙鴨胸磨菇意粉 $58
(個名漏左一半唔記得左XD)
我既意粉同佢地既三色螺絲粉個汁其實一樣...
但上檯既時候唔知係咪因為我係最尾既關係...
所以佢地個三色螺絲粉完全係乾既
我個意粉就勁多汁=D~ 岩晒我口味
坐左接近兩個鐘之後個待應生就同我地講話有人Book檯
如果我地唔Order野飲既話就要離席比張檯人
我地見佢話我地之前Order過晚餐
而家再Order野飲有半價都係每杯十幾蚊
咁咪諗住Order杯野飲坐多一粒鐘
點知轉頭佢又話原來Book檯個班係老細既Friend
唔好意思都要我地比位佢地
結果個待應生就幫我地係張Coupon度Crop滿印
(好似係原本既兩三倍印)
話下次請返我地食小食喎
咁我地離開左間Cafe之後就去左隔籬街老麥搵位坐
我見部NDS無電所以就拎左部機去阿標度叉叉電兼吹吹水
我見佢同個客係度吹緊玩滑水
(快艇係前面拉個種)
話閒日六個人Book隻艇全日都祗係千零蚊
如果係既話除返開都Okay平
不過有幾可可以閒日約到六個人一齊放假呢...
叉左幾個字電之後我就返番老麥
見佢地玩緊炸彈人
不過我同另一部機都無炸彈人隻Game
所以就轉返玩孖寶賽車
中途我斷左線跟住去買野飲
(佢地係我出去叉電既時候已經買晒)
買野飲再Search住Server既時候見到有個路人A開既Server
就叫左佢地入去挑佢機XD
原來開Server個人都唔弱
不過我地逐個逐個既機無電...
最後趁有兩個人總績分贏緊佢既時候閃人XD
打完NDS坐多陣吹多陣水之後我地就鬆人
同佢地行去搭車既時候行下行下就發覺得返自己一個
唔做電燈膽都好既=]
搭巴士返屋企既時候架巴士似乎妒忌我今日玩得咁開心=]
去到何福堂附近我醒返既時候發覺佢停左係路中心
連冷氣都熄埋
跟住見D人諗住落車...而架巴士又開返駛埋左路邊
不過之後又無事咁繼續開始行返
但原來閂左冷氣無再開返
應該係電池唔夠吧?
另外今次出黎有個意外驚喜
估唔到KEY潛左水咁耐都記得我鍾意食ROCA X)
係我食食下意粉既時候突然拎盒ROCA出黎話係比我既X]
多謝KEY !
好耐無試過咁好氣氛既聚會
其中好大既原因係因為有NDS+孖寶賽車X)
I am loving it
下次再出黎一齊玩吧X) | 
